ശ്രീധന്യയുടെ വീട്ടിലെത്തി കട്ടിലും കസേരയും സമ്മാനിച്ച സന്തോഷ് പണ്ഡിറ്റിന്റെ വീഡിയോ വൈറലാകുന്നു

കഴിഞ്ഞ രണ്ട് ദിവസമായി സോഷ്യല്‍ മീഡിയയിലെ താരമാണ് ശ്രീധന്യ. കഷ്ടപ്പാടുകളറിഞ്ഞ് ഐഎഎസ് നേടിയ ശ്രീധന്യക്ക് കഴിഞ്ഞ ദിവസമാണ് അസിസ്റ്റന്റ് കളക്ടറായി കോഴിക്കോട് നിയമനം ലഭിച്ചത്. സിവില്‍ സര്‍വീസ് പരീക്ഷയില്‍ 410-ാം റാങ്കാണ് വയനാട് പൊഴുതന സ്വദേശിയായ ശ്രീധന്യ സുരേഷ് നേടിയത്. കുറിച്യ വിഭാഗത്തില്‍പ്പെട്ട ശ്രീധന്യ കേരളത്തില്‍ ആദ്യമായി ആദിവാസി വിഭാഗത്തില്‍ നിന്നും സിവില്‍ സര്‍വീസ് നേടുന്നയാളെന്ന നേട്ടവും ഇതോടെ സ്വന്തമാക്കിയിരുന്നു. ചോര്‍ന്നൊലിക്കുന്ന വീടാണ് ശ്രീധന്യയുടേത്. മണ്ണെണ്ണ വിളക്കിന്റെ പ്രകാശത്തിലിരുന്ന് പഠിച്ചാണ് ശ്രീധന്യ വിജയം കരസ്ഥമാക്കിയത്. ശ്രീധന്യയുടെയും കുടുംബത്തിന്റെയും കഷ്ടപ്പാട് മനസ്സിലാക്കി സന്തോഷ് പണ്ഡിറ്റ് സഹായവുമായെത്തിയിരുന്നു. സന്തോഷ് പണ്ഡിറ്റ് അന്ന് വീട് സന്ദര്‍ശിച്ചതും അതുമായി ബന്ധപ്പെട്ട് സോഷ്യല്‍ മീഡിയയില്‍ പങ്കുവെച്ച വീഡിയോയും വീണ്ടും വൈറലാകുന്നു.

സന്തോഷ് പണ്ടിറ്റ് അന്ന് സോഷ്യല്‍ മീഡിയയില്‍ പങ്കുവെച്ച കുറിപ്പ്

ഞാന്‍ ഇന്ന് വയനാട് ജില്ലയിലെ പൊഴുതനയില്‍ എത്തി, ഇത്തവണ ഐഎഎസ് നേടിയ ശ്രീധന്യ എന്ന മിടുക്കിയെ നേരില്‍ സന്ദ4ശിച്ചു അഭിനന്ദിച്ചു. (വയനാട്ടില്‍ നിന്നും ആദ്യ വിജയ്)..എനിക്ക് അവിടെ ചില കുഞ്ഞു സഹായങ്ങള്‍ ചെയ്യുവാന്‍ സാധിച്ചതില്‍ അഭിമാനമുണ്ട്. അവരും മാതാപിതാക്കളും മറ്റു വീട്ടുകാരും വളരെ സ്‌നേഹത്തോടെ എന്നെ സ്വീകരിച്ചു. വളരെ കഷ്ടപ്പാട് സഹിച്ച് ചെറിയൊരു വീട്ടില്‍ താമസിച്ച് അപാരമായ ആത്മ വിശ്വാസത്തോടെ പ്രയത്‌നിച്ചാണ് അവര്‍ ഈ വിജയം കൈവരിച്ചത്. അവരുടെ വിജയം നമ്മുക്കെല്ലാം പ്രചോദനമാണ്. കഴിഞ്ഞ പ്രളയ സമയത്ത് ഒരു മാസത്തോളം വയനാടിലെ വിവിധ ഭാഗങ്ങളില്‍ സഞ്ചരിച്ചിട്ടും ഇവരുടെ വീടിനടുത്ത് വരെ ചെന്നിട്ടും അന്ന് ആ കുടുംബത്തെ കാണുവാന്‍ സാധിക്കാത്തതില്‍ എനിക്ക് ഇപ്പോള്‍ വിഷമമുണ്ട്. ഇനിയും നിരവധി പ്രതിഭകള്‍ ഉണ്ടാകട്ടെ എന്ന് ആശംസിക്കുന്നു.