മകൻ കുറ്റം ചെയ്തെന്ന് വിശ്വസിക്കുന്നില്ല, രണ്ട് പേരുള്ള മുറിയിൽ ഒരാളെ മാത്രം എങ്ങനെ പാമ്പ് കടിക്കും- സൂരജിന്റെ അച്ഛൻ

അഞ്ചല്‍ ഏറം വെള്ളശേരില്‍ വീട്ടില്‍ ഉത്ര (25) കുടുംബ വീട്ടിലെ കിടപ്പു മുറിയല്‍ മൂര്‍ഖന്‍ പാമ്പിന്റെ കടിയേറ്റ് മരിച്ച സംഭവത്തിൽ ഭർത്താവ് സൂരജ് കുറ്റം സമ്മതിച്ചിട്ടുണ്ട്. എന്നാൽ സൂരജിന്റെ മാതാപിതാക്കൾ വാർത്ത നിഷേധിച്ച് രം​ഗത്തെത്തി. മകന്‍ കുറ്റം ചെയ്‌തെന്ന് വിശ്വസിക്കുന്നില്ലെന്ന് പിതാവ് സുരേന്ദ്രന്‍ പറഞ്ഞു. രണ്ടുപേര്‍ കിടക്കുന്ന മുറിയില്‍ ഉത്തരയെ മാത്രം എങ്ങനെ പാമ്പിനെക്കൊണ്ട് കടിപ്പിക്കുമെന്ന് സുരേന്ദ്രന്‍ ചോദിക്കുന്നു.

ഉത്തരയുടെ വീട്ടുകാരുടെ ആരോപണം തെറ്റാണെന്ന് സൂരജിന്റെ മാതാവ് രേണുക പറഞ്ഞു. ഉത്തരയെ ആദ്യം പാമ്പ് കടിച്ചത് കിടപ്പുമുറിയില്‍വച്ചല്ലെന്നും, വീട്ടുമുറ്റത്തുവച്ചാണെന്നും വീട്ടുകാര്‍ പറയുന്നു. ഉടൻതന്നെ ആശുപത്രിയിൽ കൊണ്ടുപോകുകയും ചെയ്തിരുന്നുവെന്നും സൂരജിന്‍റെ വീട്ടുകാർ വ്യക്തമാക്കി. മാര്‍ച്ച്‌ മൂന്നിനാണ് ഉത്തരയെ സൂരജിന്റെ വീട്ടില്‍ നിന്ന് ആദ്യം പാമ്പ് കടിച്ചത്. ഉത്രയും സൂരജും തമ്മിൽ അസ്വാരസ്യങ്ങൾ ഉണ്ടായിരുന്നതായും മാതാപിതാക്കൾ പറഞ്ഞു. അതേസമയം ഉത്രയെ പാമ്പിനെക്കൊണ്ട് കടിപ്പിച്ചുകൊന്നതാണെന്ന വാർത്ത അടൂരിലെയും അഞ്ചലിലെയും ഇരുവരുടെയും ബന്ധുക്കളിലും നാട്ടുകാരിലും ഞെട്ടൽ ഉളവാക്കിയിട്ടുണ്ട്.

കഴിഞ്ഞ ഏഴിന് പുലര്‍ച്ചെ ആറ് മണിയോടെയാണ് ഉത്രയെ മരിച്ച നിലയില്‍ കിടപ്പുമുറിയില്‍ കണ്ടത്. പതിവിന് വിപരീതമായി മുറി തുറന്നുകിടക്കുന്നത് കണ്ട മാതാവ് മണിമേഖല അകത്ത് കയറി നോക്കിയപ്പോളാണ് ഉത്ര ചലനമറ്റ് കിടക്കുന്നതായി കണ്ടെത്തുകയായിരുന്നു. 25 കാരിയായ ഉത്രയുടെ ഭര്‍ത്താവ്​ സൂരജിനെയും കൂട്ടുപ്രതികളുടെയും അറസ്​റ്റ്​ ഉടന്‍ രേഖപ്പെടുത്തുമെന്നുമാണ്​ വിവരം. ഭര്‍ത്താവ്​ സൂരജിനെയും സുഹൃത്തായ പാമ്പ് പിടുത്തക്കാരനെയും മറ്റ്​ രണ്ട്​ സുഹൃത്തുക്കളെലും പൊലീസ്​ കസ്​റ്റഡിലെടുത്തിരുന്നു.