ബീച്ചിൽ പന്തുകളിക്കുന്നതിനിടെ തിരയിൽപ്പെട്ടു, കോഴിക്കോട് ബീച്ചിൽ കാണാതായ വിദ്യാർത്ഥികളുടെ മൃതദേഹങ്ങൾ കണ്ടെത്തി

കോഴിക്കോട്: ബീച്ചിൽ പന്തുകളിക്കുന്നതിനിടെ കടലിൽ കാണാതായ രണ്ടു വിദ്യാർഥികളുടെയും മൃതദേഹങ്ങൾ കണ്ടെത്തി. ഒളവണ്ണ സ്വദേശികളായ മുഹമ്മദ് ആദിൽ, ആദിൽ ഹസൻ എന്നിവരാണ് തിരയില്‍പ്പെട്ട് മരിച്ചത്. ഇന്നലെ രാവിലയോടെയായിരുന്നു ഇരുവരെയും കളിക്കുന്നതിനിടെ കാണാതായത്. നീണ്ട മണിക്കൂറുകൾക്കൊടുവിലാണ് കുട്ടികളുടെ മൃതദേഹം കണ്ടെത്തിയത്. വെള്ളയിൽ പുലിമുട്ട് ഹാർബറിന് സമീപത്ത് നിന്ന് ആദിൽ ഹസന്റെ മൃതദേഹം പുലർച്ചെ 4.45-ഓടെയും മുഹമ്മദ് ആദിലിന്റെ മൃതദേഹം ഇന്നലെ രാത്രി പതിനൊന്നുമണിയോടെയുമാണ് കണ്ടെത്തിയത്.

കുട്ടികളെ കാണാതായതിനെ പിന്നാലെ മത്സ്യത്തൊഴിലാളികളുടെ നേതൃത്വത്തിൽ നടത്തിയ തിരച്ചിലിലാണ് മൃതദേഹങ്ങൾ കണ്ടെത്തിയത്.കോഴിക്കോട് ബീച്ചിൽ ഫുട്‌ബോൾ കളിക്കാനെത്തിയ അഞ്ചംഗ സംഘത്തിലെ മൂന്ന് കുട്ടികൾ തിരയിൽപ്പെടുകയായിരുന്നു. മുഹമ്മദ് ആദിലിനെയും ആദിൽ ഹസ്സനെയും തിരയിൽപ്പെട്ട് കാണാതായി.

ഒരാളെ സമീപത്തുണ്ടായിരുന്നവർ ചേർന്ന് രക്ഷപ്പെടുത്തിയിരുന്നു. കോസ്റ്റ് ഗാർഡിന്റെ കപ്പലും രക്ഷാപ്രവർത്തനത്തിനായി സംഭവസ്ഥലത്തെത്തിയിരുന്നു. ഉൾക്കടലിൽ ശക്തമായ മഴയുണ്ടായിരുന്നത് രക്ഷാപ്രവർത്തനത്തെ പ്രതികൂലമായി ബാധിച്ചു.