മന്ത്രിമാര്‍ പങ്കെടുക്കില്ല,ഉദ്യോഗാര്‍ത്ഥികളുമായി ഒത്തുതീര്‍പ്പ് ചര്‍ച്ച വൈകുന്നേരം

തിരുവനന്തപുരം: സമരം ചെയ്യുന്ന പി എസ് സി ഉദ്യോഗാര്‍ത്ഥികളുമായുളള സര്‍ക്കാരിന്റെ ചര്‍‌ച്ച ഇന്ന് വൈകുന്നേരം നാലരയ്‌ക്ക് നടക്കും. ചര്‍ച്ചയില്‍ മന്ത്രിമാര്‍‌ പങ്കെടുക്കില്ല. ആഭ്യന്തര സെക്രട്ടറി ടി കെ ജോസ് ഐ എ എസും എ ഡി ജി പി മനോജ് എബ്രഹാമും ചര്‍ച്ചയ്‌ക്ക് നേതൃത്വം വഹിക്കും. സമരം ചെയ്യുന്ന റാങ്ക് ഹോള്‍ഡര്‍മാരുടെ മൂന്ന് പ്രതിനിധികളെയാണ് സര്‍ക്കാര്‍ ചര്‍ച്ചയ്‌ക്ക് ക്ഷണിച്ചിരിക്കുന്നത്.

ഉദ്യോഗസ്ഥതല ചര്‍ച്ചയില്‍ തീര്‍ച്ചയായും പങ്കെടുക്കുമെന്ന് സമരം ചെയ്യുന്ന ഉദ്യോഗാര്‍ത്ഥി ലയാ രാജേഷ് മാദ്ധ്യമങ്ങളോട് പറഞ്ഞു. ഇവരെ കൂടാതെ ജിഷ്‌ണു, വിനേഷ് തുടങ്ങി ഉദ്യോഗാര്‍ത്ഥികളും ചര്‍ച്ചയില്‍ പങ്കെടുക്കും. സര്‍ക്കാരിന്റെ ഭാ​ഗത്തുനിന്ന് മന്ത്രിമാരോ ഉദ്യോ​ഗസ്ഥരോ ആരെങ്കിലും ചര്‍ച്ച നടത്തിയാല്‍ മതിയെന്നായിരുന്നു സമരക്കാരുടെ നിലപാട്. അതുകൊണ്ട് തന്നെ ഉദ്യോ​ഗസ്ഥതല ചര്‍ച്ച എന്ന തീരുമാനത്തോട് അവര്‍ സംതൃപ്‌തരാണ്.

ചര്‍ച്ച വേണ്ടെന്ന നിലപാടിലായിരുന്ന മുഖ്യമന്ത്രിയോട് കടുംപിടിത്തം വേണ്ടെന്ന് പാര്‍ട്ടി നിര്‍ദേശിച്ചിരുന്നു. ചര്‍ച്ചയ്‌ക്ക് തയ്യാറാവണമെന്ന് ഗവര്‍ണറും ആവശ്യപ്പെട്ടതായാണ് സൂചന. ചര്‍ച്ച വേണ്ടെന്ന നിലപാട് ജനങ്ങള്‍ക്കിടയില്‍ തെറ്റിദ്ധാരണയുണ്ടാക്കുന്നു എന്നാണ് സി പി എം സംസ്ഥാന സെക്രട്ടറിയേറ്റ് വിലയിരുത്തിയത്.