പല്ലുവേദനക്ക് ചികിത്സ തേടിയത് മൂന്നു വർഷം മുന്നെ, റൂട്ട് കനാൽ ചെയ്യാൻ ഡേറ്റുകിട്ടിയത് തിങ്കളാഴ്ച

അട്ടപ്പാടിയിലെ കൂലിപ്പണിക്കാരിയായ റോസമ്മ എന്ന അമ്പത്തെട്ടുകാരി പല്ല് വേദനയ്ക്ക് ചികിത്സ തേടി തൃശൂർ ഗവ: ഡൻറൽ കോളേജിൽ ചികിത്സക്കെത്തിയത് മൂന്ന് വർഷം മുൻപ്. എന്നാൽ രോഗിക്ക് ചികിത്സയ്ക്ക് വരാനുള്ള അറിയിപ്പ് കിട്ടിയത് ഇക്കഴിഞ്ഞ തിങ്കളാഴ്ച. 2019 ജനുവരി 14നാണ് തൃശൂർ ഗവ.ഡൻറൽ കോളേജിൽ റോസമ്മ എത്തിയത്. പല്ലിന് പ്രശ്നമുണ്ടെന്ന് കണ്ടെത്തിയ ഡോക്ടർമാർ റൂട്ട് കനാൽ നടത്തണമെന്ന് പറഞ്ഞു

വരേണ്ട ദിവസം അറിയിക്കുമെന്ന് ഡോക്ടർമാർ പറഞ്ഞെങ്കിലും ആറു മാസം നോക്കിയിരുന്നിട്ടും അറിയിപ്പ് വന്നില്ല. പലരിൽനിന്നും വായ്പ വാങ്ങി റോസമ്മ സ്വകാര്യ ഡെന്റൽ ആശുപത്രിയിൽ റൂട്ട് കനാൽ ചികിത്സ നടത്തി. 10,000 രൂപയോളം ഇതിനായി ചെലവാക്കേണ്ടി വന്നു. തൃശ്ശൂർ ഡെന്റൽ കോളേജിന്റെ കാര്യം അവർ മറന്നു. പക്ഷേ, ഡെന്റൽ കോളേജ് റോസമ്മയെ മറന്നില്ല. ഓർത്തെടുക്കാൻ അല്പം കൂടുതൽ കാലമെടുത്തു എന്നുമാത്രം.