ലോക്ക് ഡൗൺ മുതൽ കുളിക്കാത്ത ഭർത്താവ് ലൈ​ഗിംകബന്ധത്തിന് നിർബന്ധിക്കുന്നു, പോലീസിന്റെ സഹായം തേടി ഭാര്യ

ലോകമാകെ ലോക്ക് ഡൗണിലായ ഈ സാഹചര്യത്തിൽ കുടുംബ ബന്ധങ്ങളിൽ വിള്ളലുകൾ വീഴുന്നു എന്ന തരത്തിലുള്ള വാർത്തകൾ പുറത്ത് വന്നിരുന്നു. ഭർത്താവിനെതിരെ വിത്യസ്തമായ പരാതിയുമായി രം​ഗത്തെത്തിയിരിക്കുകയാണ് രണ്ട് കുട്ടികളുടെ അമ്മയായ വീട്ടമ്മ. കേന്ദ്ര സര്‍ക്കാര്‍ ലോക്ക് ഡൗണ്‍ പ്രഖ്യാപിച്ച മാര്‍ച്ച്‌ 24 മുതല്‍ ഭര്‍ത്താവ് കുളിച്ചിട്ടില്ലെന്നും കുളിക്കാത്ത ഭര്‍ത്താവ് തന്നെ നിരന്തരം ലൈംഗിക ബന്ധത്തിന് നിര്‍ബന്ധിക്കുകയാണെന്ന് വീട്ടമ്മ പരാതിയില്‍ ആരോപിക്കുന്നു.

ഭര്‍ത്താവിന്റെ ശല്യം സഹിക്കാതായതോടെയാണ് വീട്ടമ്മ പൊലീസിനെ സമീപിച്ചത്. പല ചരക്ക് കട നടത്തുന്ന ഭര്‍ത്താവ് ലോക്ക് ഡൗണിനുശേഷം കടയില്‍ പോകുന്നുമില്ല. പലചരക്ക് കട തുറക്കാമെങ്കിലും ഭര്‍ത്താവ് വീട്ടില്‍ തന്നെയിരിക്കുകയാണ്. എന്നിട്ട് നിരന്തരം ലൈംഗിക ബന്ധത്തിന് നിര്‍ബന്ധിച്ച്‌ കൊണ്ടിരിക്കുന്നു എന്നാണ് വീട്ടമ്മ പരാതിയില്‍ പറയുന്നത്. ബംഗളൂരുവിലെ ജയനഗറിലാണ് പരാതിക്കാരിയായ വീട്ടമ്മയും കുടുംബവും താമസിക്കുന്നത്.

വീട്ടിലിരിക്കുന്ന ഭര്‍ത്താവ് ലോക്ക് ഡൗണ്‍ ദിവസം മുതല്‍ ഒരു തരത്തിലുളള വ്യക്തിശുചിത്വവും പാലിക്കുന്നില്ല. കൊവിഡ് പടരുന്ന സാഹചര്യത്തില്‍ വ്യക്തിശുചിത്വം പാലിക്കേണ്ടതിന്റെ ആവശ്യകതയെകുറിച്ച്‌ വീട്ടമ്മ ഭര്‍ത്താവിനെ പറഞ്ഞ് മനസിലാക്കാന്‍ പലവട്ടം ശ്രമിച്ചെങ്കിലും ഫലമുണ്ടായില്ല. അച്ഛന്‍ കുളിക്കാത്തത് കണ്ട് മക്കളും കുളിക്കാതായതായി പരാതിയില്‍ പറയുന്നു.

ലോക്ക് ഡൗണ്‍ കാലത്ത് വനിതാ സെല്ലില്‍ ലഭിച്ച നിരവധി പരാതികളില്‍ ഒന്നുമാത്രമാണിത്. വളരെക്കാലത്തിനു ശേഷം കുടുംബാംഗങ്ങള്‍‌ ഒന്നിച്ച്‌ വീട്ടില്‍ ഒത്തുകൂടിയത് പലതരത്തിലുള്ള സംഘര്‍ഷങ്ങള്‍ക്ക് ഇടയാക്കിയിട്ടുണ്ടെന്ന് പൊലീസ് വ്യക്തമാക്കുന്നു. മാനസിക ശാരീരിക പീഡനം സംബന്ധിച്ച പരാതികളുടെ എണ്ണവും കൂടിയതായും പൊലീസ് പറയുന്നു. അതേസമയം ഇത് ബംഗളുരുവിലെയോ കര്‍ണാടകത്തിലെയോ മാത്രം പ്രശ്നമല്ല. ഓസ്ട്രേലിയ, യുഎസ്, ബ്രിട്ടണ്‍ തുടങ്ങിയ രാജ്യങ്ങളിലും സമാനമായ പ്രശ്നങ്ങള്‍ റിപ്പോര്‍ട്ട് ചെയ്തിട്ടുണ്ട്.