ദുബായ്∙ 6 മാസം ലോകത്തിനു വിസ്മയങ്ങൾ സമ്മാനിച്ച ‘എക്സ്പോ 2020 ദുബായ്’ സമാപനത്തിന് ആഘോഷവർണങ്ങളുടെ ആറാട്ട്. 31ന് ഇന്ത്യയടക്കമുള്ള ലോകരാജ്യങ്ങളെ കാത്തിരിക്കുന്നത് അപൂർവതകൾ നിറഞ്ഞ ആഘോഷരാവ്.
കരിമരുന്നു പ്രയോഗം, ലേസർഷോ എന്നിവയോടെ ആരംഭിക്കുന്ന പരിപാടികളിൽ രാജ്യാന്തര പ്രതിഭകളുടെ കലാവിരുന്നുകൾ, ഘോഷയാത്ര, അഭ്യാസപ്രകടനങ്ങൾ, സമ്മാന പ്രഖ്യാപനങ്ങൾ എന്നിവയുണ്ടാകും. 56 രാജ്യങ്ങളിൽ നിന്നുള്ള 400ൽ ഏറെ കലാകാരന്മാരാണ് എത്തുന്നത്.
എ.ആർ. റഹ്മാന്റെ ഫിർദൗസ് ഓർക്കസ്ട്ര വീണ്ടും അരങ്ങിലെത്തും. എല്ലാ വേദികളിലും കൊച്ചുകൂട്ടുകാർക്കാകും മുൻഗണന. അടുത്ത 50 വർഷത്തെ വികസനമുന്നേറ്റത്തിന്റെ കാഴ്ചകളും കുട്ടികൾക്കു മുന്നിലെത്തും. രാത്രി 12ന് കരിമരുന്നു പ്രയോഗത്തിന്റെ അടുത്തഘട്ടത്തിനു തുടക്കമാകും.
പൈതൃകത്തനിമകളും മരുഭൂമിയിലെ അനുഭവങ്ങളും കോർത്തിണക്കിയുള്ള ഉദ്ഘാടനദിന ദൃശ്യവിരുന്നിന്റെ തുടർച്ചയായുള്ള പ്രത്യേക പരിപാടി കുംഭഗോപരമായ അൽ വാസൽ പ്ലാസയിൽ അരങ്ങേറും.
അതിലെ കേന്ദ്രകഥാപാത്രമായ പെൺകുട്ടി എക്സ്പോ നടന്ന 182 ദിവസങ്ങളിലെ പുതിയ അറിവുകളുടെയും സൗന്ദര്യ വർണങ്ങളുടെയും ലോകത്തേക്ക് സദസ്സിനെ കൂട്ടിക്കൊണ്ടുപോകും.
