ഭീകരരെ പൂർണ്ണമായും ഇല്ലാതാക്കും, 2022ൽ ഇതുവരെ 11 പേരെ വധിച്ചു: ഐജി വിജയ്കുമാർ

2022 ആരംഭിച്ച് പത്തുദിവസം പിന്നിടുന്നതിന് മുൻപേ 11 ഭീകരരെ വധിച്ചെന്ന് കശ്മീർ ഐജി വിജയ് കുമാർ. അനന്തനാഗിലും കുൽഗാമിലും പുൽവാമയിലും ബുദ്ഗാമിലും കഴിഞ്ഞ ഒരാഴ്ചയായി നടക്കുന്ന ഏറ്റുമുട്ടലുകളിൽ ഒരു ഭീകരൻ പോലും രക്ഷപെട്ടില്ലെന്നാണ് സൈന്യം തെളിവ് നിരത്തുന്നത്. ഇന്ന് രാവിലെ മൂന്ന് ഭീകരരെ വധിച്ചതോടെയാണ് ആകെ കൊല്ലപ്പെട്ട ഭീകരരുടെ എണ്ണം 11 ആയി ഉയർന്നത്. താഴ്വരയിൽ സജീവമായിട്ടുള്ള 170നടുത്ത് ഭീകരരെ ഒന്നൊന്നായി വകവരുത്തുക തന്നെ ചെയ്യുമെന്ന് വിജയ് കുമാർ പറഞ്ഞു.

ഇന്നലെ ഗ്രാമവാസികളിൽ നിന്നും ലഭിച്ച വിവരങ്ങളുടെ അടിസ്ഥാനത്തിലാണ് അർദ്ധരാത്രി റെയ്ഡ് നടത്തിയത്. ജയ്‌ഷെ മുഹമ്മദ് ഭീകരർക്കെതിരെ സൈന്യവും പോലീസും സംയുക്തമായാണ് നീങ്ങിയത്. സി.ആർ.പി.എഫ് സംഘം നേതൃത്വം നൽകിയ ഭീകരവേട്ട രാത്രി മുതൽ പുലർച്ചെ വരെ നീണ്ടു. ഒരു പ്രദേശവാസിക്ക് പോലും അപകടം വരാതെ രാജ്യദ്രോഹശക്തികളെ തകർക്കാൻ സാധിക്കുന്നതിൽ ഏറെ അഭിമാനിക്കുന്നുവെന്നും വിജയ്കുമാർ പറഞ്ഞു.

സൈന്യത്തിന്റെ ഹിറ്റ്‌ലിസ്റ്റിലാണ് എല്ലാ ഭീകരരും. കാരണം അവർ ജമ്മുകശ്മീരിൽ തമ്പടിക്കുന്നത് ഓരോ ഇന്ത്യക്കാരന്റേയും ജീവന് വിലപറയാനാണ്. അതിനാൽ തന്നെ എത്രയും വേഗം അത്തരക്കാരെ കണ്ടെത്തി ഇല്ലാതാക്കുക എന്നതുമാത്രമാണ് സൈന്യത്തിന് മുന്നിലുള്ള ദൗത്യമെന്നും ഏത് സാഹചര്യത്തെ നേരിടാനും ഏതു നിമിഷവും സുരക്ഷാ സേനകൾ തയ്യാറാണെന്നും വിജയ് കുമാർ പറഞ്ഞു.