മിഠായി തൊണ്ടയിൽ കുടുങ്ങി 4 വയസ്സുകാരന് ദാരുണാന്ത്യം. മിഠായി തൊണ്ടയിൽ കുടുങ്ങിയതിന് പിറകെ ശ്വാസം മുട്ടിയാണ് കുട്ടി മരണപ്പെടുന്നത്. കുട്ടിയെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഉത്തർപ്രദേശിലെ ഗ്രേറ്റർ നോയിഡയിലാണ് ദാരുണ സംഭവം നടന്നത്.
സനിയാൽ എന്ന 4 വയസ്സുള്ള ആൺകുട്ടിയാണ് മരണപ്പെട്ടത്. മുത്തശ്ശനിൽ നിന്നും വഴക്കിട്ട് വാങ്ങിയ പണം കൊണ്ടാണ് കുട്ടി മിഠായി വാങ്ങുന്നത്. വീട്ടിലെത്തിയ സനിയാൽ മിഠായി കഴിച്ചപ്പോൾ അത് തൊണ്ടയിൽ കുടുങ്ങുകയായിരുന്നു. ഇതോടെ ശ്വാസതടസ്സം ഉണ്ടായി.
കുട്ടിയുടെ നില വഷളാകുന്നത് കണ്ട രക്ഷിതാക്കൾ ഉടൻ ആശുപത്രിയിൽ എത്തിച്ചു. കുട്ടിക്ക് സംസാരിക്കാൻ കഴിഞ്ഞിരുന്നില്ല. കണ്ണിൽ നിന്ന് കണ്ണുനീർ മാത്രം വരുന്നുണ്ടായിരുന്നു. ഡോക്ടർമാരുടെ ചികിത്സയ്ക്കിടെ കുട്ടി മരിച്ചു. മാതാപിതാക്കളുടെ ഏകമകനായിരുന്നു സനിയാൽ. ഡോക്ടർമാർ കുട്ടിയുടെ മൃതദേഹം ബന്ധുക്കൾക്ക് വിട്ടുകൊടുത്തു. പിന്നീട് തിങ്കളാഴ്ച വൈകിട്ടോടെ മൃതദേഹം സംസ്‌കരിച്ചു.
