![shane warne passed away](https://thekarmanews.com/wp-content/uploads/2022/03/shane-warne-passed-away.jpg)
കാന്ബറ: ഓസ്ട്രേലിയന് ക്രിക്കറ്റ് ഇതിഹാസം ഷെയ്ന് വോണ് (52) അന്തരിച്ചു. SHane warne passed away തായ്ലന്ഡിലെ വീട്ടില്വച്ചായിരുന്നു അന്ത്യം. ഹൃദയാഘാതമാണ് മരണകാരണമെന്നാണ് വിവരം. വീട്ടില് അബോധാവസ്ഥയില് കണ്ടെത്തുകയായിരുന്നു. ടെസ്റ്റ് ക്രിക്കറ്റില് ഏറ്റവും കൂടുതല് വിക്കറ്റുകള് നേടിയ രണ്ടാമത്തെ താരമാണ്.
തായ്ലന്ഡിലെ കോ സാമുയിയിലെ വീട്ടില് അദ്ദേഹത്തെ മരിച്ച നിലയില് കണ്ടെത്തുകയായിരുന്നുവെന്ന് വോണിന്റെ മാനേജ്മെന്റ് പുറത്തിറക്കിയ പ്രസ്താവനയില് പറയുന്നു. എക്കാലത്തെയും മികച്ച സ്പിന്നര്മാരില് ഒരാളായാണ് ഷെയ്ന് വോണ് വിലയിരുത്തപ്പെടുന്നത്. വോണ്-സച്ചിന്, വോണ്-ലാറ പോരാട്ടം അക്കാലത്ത് വിഖ്യാതമായിരുന്നു. ടെസ്റ്റില് 145 മത്സരങ്ങളില് 2.65 ഇക്കോണമിയില് 708 വിക്കറ്റും 194 ഏകദിനങ്ങളില് 4.25 ഇക്കോണമിയില് 293 വിക്കറ്റും വോണിന്റെ പേരിലുണ്ട്. ട്വന്റി-20യില് 73 മത്സരങ്ങളില് നിന്ന് 70 വിക്കറ്റും നേടി.
ഇന്ത്യയിലും വലിയ ആരാധകവ്യൂഹം വോണിനുണ്ടായിരുന്നു. ഐപിഎല്ലില് 55 മത്സരങ്ങളില് 57 വിക്കറ്റ് വീഴ്ത്തി. ഐപിഎല്ലിന്റെ പ്രഥമ സീസണില് രാജസ്ഥാന് റോയല്സിനെ അപ്രതീക്ഷിത കിരീടത്തിലേക്ക് നയിച്ച ക്യാപ്റ്റനായിരുന്നു ഷെയ്ന് വോണ്.