സംസ്ഥാനത്ത് ഭക്ഷ്യ കിറ്റ് വിതരണം സംബന്ധിച്ച് ഇന്നും പരസ്പരം വിമര്‍ശിച്ച് മുഖ്യമന്ത്രിയും പ്രതിപക്ഷ നേതാവും. സംസ്ഥാനത്ത് തെരഞ്ഞെടുപ്പ് തീയതി അടുക്കുന്നതോടെ ഭക്ഷ്യ കിറ്റ് വിതരണം തന്നെയാണ് പ്രധാന രാഷ്ട്രീയ ചര്‍ചയായി മാറിയിരിക്കുന്നത്. അരി മുടക്കാനുള്ള നീക്കത്തില്‍ നിന്ന് പ്രതിപക്ഷ നേതാവ് പിന്മാറണമെന്ന് മുഖ്യമന്ത്രി തുറന്നടിച്ചു. സങ്കുചിത മനസിന് ഉടമയായതുകൊണ്ടാണ് ജനക്ഷേമ പ്രവര്‍ത്തനങ്ങള്‍ തടയാന്‍ ചെന്നിത്തല ശ്രമിക്കുന്നത്. പ്രതിപക്ഷ നേതാവ് ജനങ്ങളോട് മാപ്പ് പറയാന്‍ തയ്യാറാകണമെന്നും മുഖ്യമന്ത്രി ആവശ്യപ്പെട്ടു.
അതേ നാണയത്തില്‍ തന്നെ ആയിരുന്നു ചെന്നിത്തലയുടെ പ്രതികരണം. ജനങ്ങളുടെ അന്നം മുടക്കുന്നത് മുഖ്യമന്ത്രിയാണെന്നായിരുന്നു ചെന്നിത്തലയുടെ മറുപടി. ഭക്ഷ്യസാധനങ്ങള്‍ പൂഴ്ത്തിവച്ച് തെരഞ്ഞെടുപ്പ് സമയത്ത് വിതരണം ചെയ്ത് അന്നും മുടക്കിയത് മുഖ്യമന്ത്രിയാണെന്നും ചെന്നിത്തല തിരിച്ചടിച്ചു. തെരഞ്ഞെടുപ്പ് തീയതി അടുക്കുന്നതോടെ സംസ്ഥാനത്ത് രാഷ്ട്രീയ പോരും മുറുകുകയാണ്.
