അമേരിക്കയുടെ വൈസ് പ്രസിഡന്റിന്റെ പേരും ഔദ്യോഗിക സ്ഥാനവും ദുരുപയോഗം ചെയ്യുന്നതായി പരാതി. കമലാ ഹാരിസിന്റെ സഹോദരി പുത്രി മീന ഹാരിസിനെതിരെയാണ് വിമര്‍ശനം ഉയരുന്നത്. കമലയുടെ സഹോദരി മായാ ഹാരീസിന്റെ മകളാണ് മീന ഹാരിസ്. കമലാ ഹാരിസിന്റെ സമൂഹമാദ്ധ്യമങ്ങള്‍ കൈകാര്യം ചെയ്യുന്നത് മീന ഹാരിസാണ്. കമലാ ഹാരിസിന്റെ പേരും ഔദ്യോഗിക സ്വാധീനവും മീന തന്റെ സമൂഹ മാധ്യമ പ്രചരണത്തിന് ഉപയോഗിക്കുന്നുവെന്നാണ് വിമര്‍ശനം.
‘ചില കാര്യങ്ങള്‍ ചെയ്തുപോയാല്‍ അതില്‍ നിന്നും പിന്മാറാനാകില്ല. നിയന്ത്രണങ്ങളെന്നും ആവശ്യമാണ്. പെരുമാറ്റത്തില്‍ തികച്ചും മാറ്റങ്ങള്‍ അനിവാര്യമാണ്. മീനയുടെ സ്വകാര്യ സംരഭങ്ങളില്‍ പോലും കമല ബ്രാന്‍ഡായി മാറുന്നത് ഗൗരവമുള്ള പ്രശ്നമാണെന്നും വിമര്‍ശകര്‍ ചൂണ്ടിക്കാട്ടുന്നു. അഭിഭാഷക, എഴുത്തുകാരി, സംരംഭക എന്നീ നിലകളിലും പ്രശസ്തയാണ് കമലയുടെ സഹോദരി പുത്രി മീന. ഇന്‍സ്റ്റാഗ്രാമില്‍ മാത്രം എട്ടു ലക്ഷം ആരാധകരുള്ള പ്രമുഖ വ്യക്തി എന്ന നിലയില്‍ മീന തന്റെ സ്വകാര്യ സംരംഭങ്ങളിലും കമലയുടെ പേര് ഉപയോഗിക്കുന്നുവെന്നാണ് ആക്ഷേപം.
മീനാ ഹാരിസിന്റെ രാഷ്ട്രീയ പോസ്റ്റുകളും വ്യക്തി പരമായ പോസ്റ്റുകളും ഏറെ ജനപ്രീയമാണ്. ഇതിനിടെ മീന ഹാരിസ് തന്റെ പുതിയ പുസ്തകത്തിന്റെ പ്രചാരണത്തിന് കമലാ ഹാരിസിന്റെ പേര് ഉപയോഗിച്ചതിനെ വിമര്‍ശിച്ച് അമേരിക്കന്‍ മാദ്ധ്യമങ്ങളും രംഗത്തെത്തിയിട്ടുണ്ട്.
