തിരുവനന്തപുരം. നിയമസഭാ കയ്യാങ്കളി കേസ് അട്ടിമറിക്കാന്‍ പുതിയ നീക്കവുമായി മുന്‍ എംഎല്‍എമാര്‍ കോടതിയില്‍. നിയമസഭാ കയ്യാങ്കളികേസില്‍ തുടരന്വേഷണം ആവശ്യപ്പെട്ടാണ് മുന്‍എംഎല്‍എമാരായ ഇഎസ് ബിജിമോള്‍, ഗീതാ ഗോപി എന്നിവര്‍ കോടതിയെ സമീപിച്ചത്. ഇരുവരും തിരുവനന്തപുരം സിജിഎം കോടതിയെയാണ് സമീപിച്ചത്. ഇഎസ് ബിജിമോള്‍, ഗീതാ ഗോപി വെവ്വേറെ ഹര്‍ജികളാണ് സമര്‍പ്പിച്ചിരിക്കുന്നത്.
കേസില്‍ കുറ്റപത്രം സമര്‍പ്പിച്ചത് അറിഞ്ഞത് അടുത്തകാലത്താണെന്നാണ് ഇരുവരുടെയും വാദം. അതിനാല്‍ കുറ്റപത്രം വായിക്കുവാന്‍ സാധിച്ചത് ഇപ്പോഴാണ്. തുടര്‍ന്ന് നടത്തിയ പരിശോധനയില്‍ കുറ്റപത്രത്തില്‍ അപാകതകള്‍ ഉണ്ടെന്നും ഇരുവരും വാദിക്കുന്നു. നിയമസഭയില്‍ നടന്ന സംഘര്‍ഷത്തില്‍ യുഡിഎഫ് എംഎല്‍എമാരില്‍ നിന്നും പരിക്കേറ്റതായിട്ടാണ് ഇവര്‍ പറയുന്നത്. ഇതിന്റെ ചികിത്സ രേഖകളും കുറ്റപത്രത്തിലുണ്ട്. എന്നാല്‍ കേസില്‍ തങ്ങളെ സാക്ഷികളാക്കിയിട്ടില്ലെന്ന് ഇഎസ് ബിജിമോള്‍, ഗീതാ ഗോപിയും പറയുന്നു.
