കോട്ടയം. സംസ്ഥാനം കടുത്ത സാമ്പത്തിക പ്രതിസന്ധിയിലൂടെയാണ് കടന്ന് പോകുന്നതെന്ന് സമ്മതിച്ച് ധനവകുപ്പ്. നൽകാമെന്ന് സമ്മതിച്ച പെൻഷൻ പരിഷ്കരണ കുടിശ്ശികയും ക്ഷാമാശ്വാസവും ഉടനെയില്ല എന്ന് വ്യക്തമാക്കി ധനവകുപ്പ് സെക്രട്ടറി ഇറക്കിയ ഉത്തരവിലാണിത്.
സർവീസ് പെൻഷൻകാർ, കുടുംബ പെൻഷൻകാർ എന്നിവരുടെ പെൻഷൻ പരിഷ്കരണ കുടിശ്ശികയുടെയും ക്ഷാമാശ്വാസത്തിന്റെയും മൂന്നും നാലും ഗഡുക്കൾ ഈ സാമ്പത്തികവർഷവും അടുത്ത സാമ്പത്തികവർഷവുമായി നൽകാൻ രണ്ടു ഉത്തരവുകൾ നേരത്തെ ഇറങ്ങിയിരുന്നു. എന്നാൽ സാമ്പത്തികസ്ഥിതി കണക്കിലെടുത്ത് ആ ബാധ്യത ഉടനെ ഏറ്റെടുക്കാനാവില്ലെന്നാണ് പുതിയ ഉത്തരവ്.
അടുത്ത സാമ്പത്തികവർഷത്തെ ധനസ്ഥിതിയുടെ അടിസ്ഥാനത്തിൽ പിന്നീട് തീരുമാനമെടുക്കുമെന്നും പറയുന്നു. സർവീസിലിരിക്കെ മരിച്ചവരുടെ ഗ്രാറ്റ്വിറ്റി, വിരമിച്ചവരുടെ ആർജിതാവധി പണമാക്കൽ എന്നിവയിലെ കുടിശ്ശികയെയും ഉത്തരവ് ബാധിക്കും.
