തിരുവനന്തപുരം: കേരള പോലീസിനെ നോക്കുകുത്തിയാക്കി ഇൻസ്റ്റാഗ്രാമിൽ സ്വർണക്കടത്ത് സംഘത്തിന്റെ അക്കൗണ്ട്. കേരളത്തിലേയ്ക്ക് യുകെ അമേരിക്ക, സൗദി അറേബ്യ, യു എ ഇ, ഒമാൻ എന്നിവിടങ്ങളിൽ നിന്ന് സ്വർണം കടത്തുമെന്നും ആവശ്യമുള്ളവർ ബന്ധപ്പെടണമെന്നുമാണ് അക്കൗണ്ടിൽ പറയുന്നത്. അക്കൗണ്ടിൽ നിരവധി വീഡിയോകൾ പോസ്റ്റ് ചെയ്തിട്ടുണ്ട്. സ്വർണം കടത്തുന്നതിന്റെ രീതിയും ദൃശ്യങ്ങളുമടക്കം ഇരുപതോളം വീഡിയോകൾ ഈ അക്കൗണ്ടിൽ ഉണ്ട്.
അതേസമയം ഈ അക്കൗണ്ട് വ്യാജമാണോ അതോ കള്ളക്കടത്ത് സംഘവുമായി ബന്ധമുള്ളതാണോയെന്നത് സംബന്ധിച്ച് പൊലീസ് അന്വേഷണം ആരംഭിച്ചിരിക്കുകയാണ്. 14,000ൽ അധികം പേരാണ് ഈ അക്കൗണ്ട് ഫോളോ ചെയ്യുന്നത്. എന്നാൽ അക്കൗണ്ട് പത്തുപേരെ മാത്രമേ ഫോളോ ചെയ്യുന്നുള്ളൂ. കേരള പൊലീസിനെയും മാദ്ധ്യമങ്ങളെയും മാത്രമാണ് ഈ അക്കൗണ്ട് ഫോളോ ചെയ്യുന്നത്എന്നതും ശ്രദ്ധേയമാണ്.
മലബാർ മേഖലയിലുള്ളവരുടെ ശബ്ദവുമായി വീഡിയോകളിലെ ശബ്ദം സാമ്യമുള്ളതിനാൽ മലബാർ കേന്ദ്രീകരിച്ച് സ്വർണക്കടത്ത് നടത്തുന്നവരുമായി അക്കൗണ്ടിന് ബന്ധമുണ്ടോയെന്നത് പൊലീസ് അന്വേഷിക്കുന്നുണ്ട്. അക്കൗണ്ടിൽ കമന്റ് ചെയ്തവർക്ക് സമ്മാനം നൽകിയെന്ന് അക്കൗണ്ടിൽ പോസ്റ്റുള്ളതിനാൽ ഇതും പൊലീസ് കണക്കിലെടുത്തിട്ടുണ്ട്. അക്കൗണ്ട് വ്യാജമാണെങ്കിലും നടപടി എടുക്കുമെന്ന് പോലീസ് വ്യക്തമാക്കി.
