പാറ്റ്‌ന : ജോലിയിൽ സ്ഥാനക്കയറ്റം നൽകുന്നതിന് പകരം വനിതാ ഇൻസ്പെക്ടറെ ലൈംഗികമായി പീഡിപ്പിച്ച ഡെപ്യൂട്ടി പോലീസ് സൂപ്രണ്ടിനെ സസ്‌പെൻഡ് ചെയ്തു. കൈമൂർ ജില്ലയിലെ ഡിഎസ്പി ഫായിസ് അഹമ്മദ് ഖാനെയാണ് സസ്‌പെൻഡ് ചെയ്തത്. പ്രതിയായ ഉദ്യോഗസ്ഥൻ സഹപ്രവർത്തകയെ സ്ഥാനക്കയറ്റം നേടാൻ സഹായിക്കാമെന്ന വ്യാജേന ലൈംഗികമായി പീഡിപ്പിക്കുകയായിരുന്നു.
മോഹാനിയയിൽ സേവനമനുഷ്ഠിക്കുന്ന ഫായിസ് അഹമ്മദ് വാട്ട്സ്ആപ്പിൽ പതിവായി അശ്ലീല സന്ദേശങ്ങൾ അയച്ചിരുന്നതായി പരാതിയിൽ പറയുന്നു. ഇയാളുടെ സമ്മർദ്ദത്തെ തുടർന്ന് സഹപ്രവർത്തക സ്ഥലം മാറി പോയിട്ടും ശല്യം തുടരുകയും ശാരീരിക ബന്ധത്തിന് നിർബന്ധിക്കുകയുമായിരുന്നു. കൈമൂർ പ്രദേശത്ത് ജോലിചെയ്യുന്ന സഹപ്രവർത്തകയാണ് ഫായിസ് അഹമ്മദിനെതിരെ പരാതി നൽകിയത്.
പരാതിയുടെ നിജസ്ഥിതി കണ്ടെത്താൻ ബിഹാർ പോലീസ് അന്വേഷണ സമിതിയെ നിയമിച്ചിരുന്നു. തുടർന്ന് നടത്തിയ അന്വേഷണത്തിൽ ഇരയുടെ പരാതി സത്യമാണെന്ന് കണ്ടെത്തുകയായിരുന്നു. ഇയാൾക്കെതിരെ വകുപ്പുതല നടപടി സ്വീകരിക്കണമെന്ന അന്വേഷണ സമിതിയുടെ ശുപാർശയുടെ അടിസ്ഥാനത്തിലാണ് ഉദ്യോഗസ്ഥനെ സസ്‌പെൻഡ് ചെയ്തത്.
