പാലക്കാട്. കോയമ്പത്തൂർ കാർ സ്ഫോടന കേസുമായി ബന്ധപ്പെട്ട് പാലക്കാടും എൻഐഎ റെയ്ഡ്. പാലക്കാട് മുതലമടയിലാണ് എൻ ഐ എ യുടെ പരിശോധന. മുതലമടയിൽ താമസിക്കുന്ന ഷെയ്ക്ക് മുസ്തഫയുടെ വീട്ടിലാണ് പരിശോധന നടത്തിയത്. കേസിൽ എൻഐഎ മുൻപ് അറസ്റ്റ് ചെയ്ത റിയാസ് അബൂബക്കറിന്റെ ബന്ധുവാണ് ഷെയ്ക്ക് മുസ്തഫ.
ഷെയ്ക്ക് മുസ്തഫയുടെ വീട്ടിൽ നിന്നും ഫോണും പാസ്പോർടും പിടിച്ചെടുത്തു. കോയമ്പത്തൂർ കാർ സ്ഫോടന കേസിൽ തമിഴ്നാട്ടിൽ വ്യാഴാഴ്ച പുലർച്ചെ അഞ്ചു മണിമുതൽ എൻഐഎ വ്യാപക റെയ്ഡ് നടക്കുകയാണ്. 45 ഇടങ്ങളിലാണ് പരിശോധന നടക്കുന്നത്. കാർ സ്ഫോടന കേസുമായി ബന്ധപ്പെട്ട് എൻഐഎയുടെ നിരീക്ഷണത്തിലുള്ളവരുടെ വീടുകളിലാണ് ഉദ്യോഗസ്ഥരെത്തിയത്.
ഒക്ടോബര്‍ 23ന് പുലർച്ചെ 4.03നാണ് കോട്ടമേട് സംഗമേശ്വരർ ക്ഷേത്രത്തിനു മുന്നിൽ കാറിൽ രണ്ടു ചെറിയ സ്ഫോടനങ്ങളും ഒരു വൻ സ്ഫോടനവും നടന്നത്. കാർ സ്ഫോടന കേസുമായി ബന്ധപ്പെട്ട് അറസ്റ്റിലായ ആറുപേരെ കഴിഞ്ഞ ദിവസം പുന്നമല്ലിയിലെ എൻഐഎ കോടതിയിൽ ഹാജരാക്കിയിരുന്നു. ആറുപേരെയും 22വരെ ജുഡീഷ്യൽ കസ്റ്റഡിയിൽ റിമാൻഡ് ചെയ്തതിനെ തുടർന്ന് കോയമ്പത്തൂർ ജയിലിലേക്ക് അയച്ചിരിക്കുകയാണ്.
