ന്യൂഡൽഹി: ദേശീയ സുരക്ഷ വർധിപ്പിക്കുക, പ്രതിരോധ നിർമ്മാണത്തിൽ സ്വയംപര്യാപ്തത കൈവരിക്കുക, സായുധ സേനയുടെ നവീകരണം എന്നിവയിൽ ശ്രദ്ധ കേന്ദ്രീകരിച്ച് മോദിയുടെ മൂന്നാമൂഴത്തിൽ വീണ്ടും പ്രതിരോധമന്ത്രിയായി ചുമതലയേറ്റ് രാജ്‌നാഥ്‌സിംഗ്.
പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ സുരക്ഷാ സംവിധാനങ്ങൾ ശക്തിപ്പെടുത്താനും പ്രതിരോധ ഉൽപ്പാദനത്തിൽ സ്വയംപര്യാപ്തത കൈവരിക്കാനുമാണ് ലക്ഷ്യമിടുന്നത്. അതിനായിരിക്കും മുൻഗണന. സായുധ സേനയെ നവീകരിക്കുന്നതും സേവനമനുഷ്ഠിക്കുന്നവരുടെയും വിരമിച്ച സൈനികരുടെയും ക്ഷേമം ഉറപ്പാക്കുന്നതും ഉൾപ്പെടുന്നു. പ്രതിരോധ മേഖലയിലെ കയറ്റുമതി വർധിപ്പിക്കാനാണ് സർക്കാർ ലക്ഷ്യമിടുന്നതെന്നും അടുത്ത അഞ്ചു വർഷത്തിനുള്ളിൽ 50,000 കോടി രൂപയുടെ പ്രതിരോധ സാമഗ്രികൾ ഇന്ത്യ കയറ്റിയയ്‌ക്കുമെന്നും അദ്ദേഹം ആത്മവിശ്വാസം പ്രകടിപ്പിച്ചു.
2023-24 സാമ്പത്തിക വർഷത്തിൽ 21,083 കോടി രൂപയുടെ റെക്കോഡ് നേട്ടം കൈവരിച്ചതായി ചൂണ്ടിക്കാട്ടി, ഉന്നത പദവി ഏറ്റെടുത്തതിന് ശേഷമുള്ള തൻ്റെ ആദ്യ പ്രധാന പ്രസ്താവനയിൽ പ്രതിരോധ കയറ്റുമതി വർദ്ധിപ്പിക്കുകയെന്ന ലക്ഷ്യവും പ്രതിരോധ മന്ത്രി എടുത്തുപറഞ്ഞു. “ഇത് ചരിത്രപരമാണ്. 2028-29 ഓടെ 50,000 കോടി രൂപയുടെ പ്രതിരോധ ഉപകരണങ്ങൾ കയറ്റുമതി ചെയ്യുകയാണ് ഞങ്ങളുടെ ലക്ഷ്യമെന്നും അദ്ദേഹം പറഞ്ഞു.
ഏത് വെല്ലുവിളികളെയും നേരിടാൻ അത്യാധുനിക ആയുധങ്ങളും പ്ലാറ്റ്‌ഫോമുകളും ഉപയോഗിച്ച് സായുധ സേനയെ സജ്ജമാക്കേണ്ടതിൻ്റെ പ്രാധാന്യവും അദ്ദേഹം ഊന്നിപ്പറഞ്ഞു. രാജ്യത്തിൻ്റെ ഐക്യം, അഖണ്ഡത, പരമാധികാരം എന്നിവ സംരക്ഷിക്കുന്നതിനുള്ള സൈനിക ഉദ്യോഗസ്ഥരുടെ സമർപ്പണത്തെ അദ്ദേഹം പ്രശംസിച്ചു.
അതിനിടെ, തൻ്റെ ചുമതല ഏറ്റെടുത്തതിന് തൊട്ടുപിന്നാലെ, പുതിയ സർക്കാരിൻ്റെ കീഴിലുള്ള MoD-യുടെ ആദ്യ 100 ദിവസത്തെ പ്രവർത്തന പദ്ധതിയെക്കുറിച്ചുള്ള അവലോകന യോഗത്തിൽ സിംഗ് അധ്യക്ഷനായി. വിമുക്തഭടന്മാരുടെ ക്ഷേമം, വിമുക്തഭടൻമാരുടെ ക്ഷേമ വകുപ്പുമായി ബന്ധപ്പെട്ട പ്രധാന പ്രശ്നങ്ങൾ എന്നിവ ചർച്ച ചെയ്തു. 100 ദിവസത്തെ കർമ്മ പദ്ധതിയിൽ പറഞ്ഞിരിക്കുന്ന അജണ്ടയിൽ സ്വയം പ്രതിജ്ഞാബദ്ധരാകാൻ അദ്ദേഹം ഉദ്യോഗസ്ഥരോട് അഭ്യർത്ഥിച്ചു.
ഉത്തർപ്രദേശിലെ ലഖ്‌നൗവിൽ നിന്നും പാർലമെൻ്റ് അംഗമായ രാജ്‌നാഥ് സിംഗ് 2019 ജൂൺ 1-നാണ് പ്രതിരോധ മന്ത്രാലയത്തിന്റെ ചുമതലയേൽക്കുന്നത്.
