കൊച്ചി: മോഡലുകളുടെ മരണവുമായി ബന്ധപ്പെട്ട ദുരൂഹത നീക്കണമെന്ന് ആവശ്യപ്പെട്ട് അപകടത്തില്‍ മരിച്ച മോഡലുകളിലൊരാളായ ആന്‍സി കബീറിന്‍റെ കുടുംബം. വിപുലമായ അന്വേഷണം ആവശ്യപ്പെട്ട് ആന്‍സിയുടെ കുടുംബം പൊലീസില്‍ പരാതി നല്‍കി. നമ്ബര്‍ 18 ഹോട്ടലുടമയുടെ ഇടപെടലുകളില്‍ ദുരൂഹതയുണ്ട്. ഹോട്ടലുടമ സി.സി.ടി.വി ദൃശ്യങ്ങള്‍ നശിപ്പിച്ചുവെന്നും പൊലീസ് അറിയിച്ചതായും ആന്‍സിയുടെ കുടുംബം പറഞ്ഞു.
ആന്‍സിയുടെ കാറിനെ മറ്റൊരു കാര്‍ പിന്തുടര്‍ന്നത് എന്തിനാണെന്ന് അറിയണം. ഇതുസംബന്ധിച്ച്‌ അന്വേഷണം വേണം. നമ്ബര്‍ 18 േഹാട്ടലുടമയെ നേരത്തെ അറിയില്ല. ദൃശ്യങ്ങള്‍ നശിപ്പിച്ചിട്ടും ഹോട്ടലുടമക്കെതിരെ പൊലീസ് നടപടി സ്വീകരിക്കാത്തത് എന്തുകൊണ്ടാണെന്നും ആന്‍സിയുടെ കുടുംബം ചോദിച്ചു.
ആന്‍സി കബീറും ഡോ.അഞ്ജന ഷാജനും സഞ്ചരിച്ച കാറിന്‍റെ ഡ്രൈവര്‍ മാള സ്വദേശി അബ്ദുള്‍ റഹ്മാന്‍ ബുധനാഴ്ച വൈകീട്ടോടെ ജാമ്യത്തിലിറങ്ങി. മനപ്പൂര്‍വമല്ലാത്ത നരഹത്യ അടക്കമുള്ള വകുപ്പുകളാണ് ഇയാള്‍ക്കെതിരെ ചുമത്തിയിരുന്നത്.
നവംബര്‍ ഒന്നിന് പുലര്‍ച്ചെയാണ് കാര്‍ അപകടത്തില്‍ മുന്‍ മിസ് കേരള അന്‍സി കബീര്‍, മുന്‍ മിസ് കേരള റണ്ണറപ്പ് അഞ്ജന ഷാജന്‍ എന്നിവര്‍ മരിച്ചത്. ഗുരുതരമായി പരിക്കേറ്റ മുഹമ്മദ് ആഷിഖ് പിന്നീട് ആശുപത്രിയിലും മരിച്ചു. കാര്‍ ഡ്രൈവര്‍ അബ്ദുല്‍ റഹ്മാനെ കഴിഞ്ഞ ദിവസം പൊലീസ് ചോദ്യംചെയ്തപ്പോഴാണ് ആഡംബര കാര്‍ പിന്തുടര്‍ന്നതായി മൊഴി നല്‍കിയത്. ഡ്രൈവര്‍ അടക്കം മദ്യപിച്ചാണ് കാറില്‍ ഉണ്ടായിരുന്നതെന്നും തെളിഞ്ഞിരുന്നു.
