ന്യൂഡൽഹി : ഭാരത് മണ്ഡപം G20 ഹാളിന്റെ ചിത്രങ്ങൾ പുറത്ത്. ജി 20 ഉച്ചകോടിക്ക് ഒരുങ്ങുന്ന ഡൽഹിയിൽ ചടങ്ങുകൾക്ക് ആതിഥേയത്വം വഹിക്കാൻ പ്രഗതി മൈതാനിൽ നവീകരിച്ച ഐ.ടി.പി.ഒ. സമുച്ചയം കഴിഞ്ഞ ദിവസമാണ് പ്രധാനമന്ത്രി നരേന്ദ്രമോദി ഉദ്ഘാടനം ചെയ്തത്. ഇതിന് പിന്നാലെ ഹാളിന്റെ ചിത്രങ്ങളും പുറത്തുവിട്ടു. ഇന്റർനാഷണൽ എക്സിബിഷൻ കം കൺവെൻഷൻ സെന്റർ സമുച്ചയമായാണ് നവീകരിച്ചിരിക്കുന്നത്. ഇന്നലെ രാവിലെനടന്ന പൂജാചടങ്ങുകൾക്കുശേഷം വൈകുന്നേരം നടന്ന പൊതുസമ്മേളനത്തിലായിരുന്നു ഉദ്ഘാടനം നടന്നത്.
ചടങ്ങിൽ തൊഴിലാളികളെ പ്രധാനമന്ത്രി ആദരിച്ചു. ശേഷം പ്രധാനമന്ത്രി അവരുമായി സംവദിക്കുകയും തൊഴിലാളികൾക്കൊപ്പം ചിത്രങ്ങളെടുക്കുകയും ചെയ്തു. നവീകരിച്ച പ്രഗതി മൈതാനത്തിന്റെ പേര് ‘ഭാരത് മണ്ഡപം’ എന്ന് പ്രധാനമന്ത്രി പുനർനാമകരണവും ചെയ്തിരുന്നു. ഉദ്ഘാടനച്ചടങ്ങിൽ കേന്ദ്രമന്ത്രിമാരും സാംസ്‌കാരിക, സാമൂഹിക, വ്യവസായ രംഗത്തെ പ്രമുഖരുമടക്കം മൂവായിരത്തോളം പേർ പങ്കെടുത്തു. തുടർന്ന് ഡ്രോൺ ആകാശത്ത് പറത്തിയാണ് ഭാരത് മണ്ഡപമെന്ന പുതിയ പേര് പ്രധാനമന്ത്രി അനാവരണം ചെയ്തു.
സെപ്റ്റംബറിൽ നടക്കുന്ന ജി 20 നേതാക്കളുടെ യോഗത്തിനായാണ് വേണ്ടിയാണ് പ്രഗതി മൈതാന സമുച്ചയം എന്നറിയപ്പെടുന്ന ഐടിപിഒ സമുച്ചയം നവീകരിച്ചിരിക്കുന്നത്. 2700 കോടി രൂപ ചിലവിലാണ് പ്രഗതി മൈതാന സമുച്ചയം നിർമ്മിച്ചിരിക്കുന്നത്. പുതിയ ഐടിപിഒ സമുച്ചയത്തിന് ഏകദേശം 123 ഏക്കർ വിസ്തീർണമാണുള്ളത്. ഇന്ത്യയിലെ ഏറ്റവും പ്രധാനപ്പെട്ട യോഗങ്ങളും, കോൺഫറൻസുകളും, എക്‌സിബിഷനുകളുമെല്ലാം ഇവിടെ വെച്ചാണ് നടത്തുക.
അന്താരാഷ്‌ട്ര പ്രദർശനങ്ങൾ, വ്യാപാരമേളകൾ, കൺവെൻഷനുകൾ, കോൺഫറൻസുകൾ, മറ്റ് ബിസിനസ് പരിപാടികൾ എന്നിവ ഐഇസിസി സമുച്ചയത്തിൽ സംഘടിപ്പിക്കാനാകും. കോൺഫറൻസ് ഹാളുകൾക്ക് പുറമേ നിരവധി മീറ്റിംഗ് റൂമുകൾ, ലോഞ്ചുകൾ, ഓഡിറ്റോറിയങ്ങൾ, ആംഫി തിയേറ്ററുകൾ എന്നിയ ഐടിപിഒ സമുച്ചയത്തിൽ ഉൾപ്പെടുത്തിയിട്ടുണ്ട്. 2700 കോടി രൂപ ചിലവിലാണ് സമുച്ചയം നവീകരിച്ചത്.
