![k-phone](https://thekarmanews.com/wp-content/uploads/2020/10/k-phone.jpg)
സംസ്ഥാന സര്ക്കാരിന്റെ അതിവേഗ ഇന്റര്നെറ്റ് പദ്ധതിയായ കെ ഫോണ് ഡിസംബറിലെത്തും. ഒപ്റ്റിക്കല് ഫൈബര് ശൃംഖല സംസ്ഥാനത്താകെ സ്ഥാപിക്കുന്നതാണ് പദ്ധതി. സംസ്ഥാനത്തെ ഡിജിറ്റല് ഇന്ഫ്രാസ്ട്രക്ച്ചര് ശക്തമാക്കുന്നതിന് സംസ്ഥാന സര്ക്കാര് ആവിഷ്കരിച്ച പദ്ധതിയാണ് കെഫോണ്. വീടുകളിലും, 30,000 ത്തോളം ഓഫീസുകളിലും ഇന്റര്നെറ്റ് കണക്ഷന് എത്തിക്കും. സാമ്പത്തികമായി പിന്നോക്കം നില്ക്കുന്ന സംസ്ഥാനത്തെ 20 ലക്ഷത്തോളം കുടുംബങ്ങള്ക്ക് സൗജന്യമായി ഇന്റര്നെറ്റ് കണക്ഷന് നല്കും. ബാക്കിയുള്ളവരില് നിന്ന് മിതമായ നിരക്ക് ഈടാക്കും.
കെഎസ്ഇബിയും കെഎസ്ഐറ്റിഐഎല്ഉം ചേര്ന്നുള്ള സംയുക്ത സംരംഭം കെഫോണ് ലിമിറ്റഡ് വഴിയാണ് പദ്ധതി നടപ്പാക്കുന്നത്. ഡിസംബറില് പ്രാവര്ത്തികമാക്കാന് തക്കവിധം പദ്ധതി സമയബന്ധിതമായി മുന്നോട്ടുപോകുകയാണെന്ന് കെഎസ്ഇബി അധികൃതര് വ്യക്തമാക്കി. പദ്ധതി തുടങ്ങുന്നതിനാവശ്യമായ പഠനവും ടെന്ഡര് നടപടികളും പൂര്ത്തീകരിക്കുകയും, പദ്ധതിയുടെ നടത്തിപ്പിനായി ഭാരത് ഇലക്ട്രോണിക്സ് ലിമിറ്റഡ് നേതൃത്വം നല്കുന്ന കണ്സോഷ്യത്തിന് കരാര് നല്കുകയും ചെയ്തിട്ടുണ്ട്.
സംസ്ഥാന സര്ക്കാരിന്റെയും മറ്റ് സ്വകാര്യ ടെലികോം സര്വീസ് പ്രൊവൈഡറിന്റെയും നിലവിലുള്ള ബാന്റ് വിഡ്ത്ത് പരിശോധിച്ച് അതിന്റെ അപര്യാപ്തത മനസിലാക്കുകയും അത് പരിഹരിച്ച് ഭാവിയിലേക്ക് ആവശ്യമായ ബാന്റ് വിഡ്ത്ത് സജ്ജമാക്കുന്ന രീതിയിലാണ് ഈ പദ്ധതി വിഭാവനം ചെയ്തിട്ടുള്ളത്.
കെഫോണ് പദ്ധതിയുടെ നേട്ടങ്ങള്
- എല്ലാ സര്വ്വീസ് പ്രൊവൈഡര്മാര്ക്കും (കേബിള് ഓപ്പറേറ്റര്, ടെലകോം ഓപ്പറേറ്റര്, ഇന്റര്നെറ്റ് സര്വ്വീസ് പ്രൊവൈഡര്, കണ്ടന്റ് സര്വ്വീസ് പ്രൊവൈഡര്) തുല്യമായ അവസരം നല്കുന്ന ഒപ്റ്റിക് ഫൈബര് നെറ്റ് വര്ക്ക് സംസ്ഥാനത്ത് നിലവില് വരും.
- ഐടി പാര്ക്കുകള്, എയര്പോര്ട്ട്, തുറമുഖം തുടങ്ങിയ ഇടങ്ങളില് അതിവേഗ ഇന്റര്നെറ്റ് ലഭ്യമാകും.
- 30000-ല് അധികം സര്ക്കാര് സ്ഥാപനങ്ങളിലും, വിദ്യാഭ്യാസ സ്ഥാപനങ്ങളിലും 10mbps- മുതല് 1Gbps വേഗതയില് നെറ്റ് കണക്ഷന് ലഭ്യമാകും.
- ആര്ട്ടിഫിഷല് ഇന്റലിജന്സ്, ബ്ലോക്ക് ചെയിന്, ഇന്റര്നെറ്റ് ഓഫ് തിങ്സ്, സ്റ്റാര്ട്ടപ്പ്, സ്മാര്ട്ട് സിറ്റി തുടങ്ങിയ മേഖലകളില് കെഫോണ് സൗകര്യമൊരുക്കും.
- ഗ്രാമങ്ങളിലും ചെറുകിയ സംരംഭങ്ങള്ക്ക് ഇ-കോമേഴ്സ് വഴി വില്പ്പന നടത്താം.
- സര്ക്കാര് സേവനങ്ങളായ ഇ-ഹെല്ത്ത്, ഇ-എഡ്യൂക്കേഷന് മറ്റ് ഇ- സര്വ്വീസുകള്ക്ക് കൂടുതല് ബാന്റ് വിഡ്ത്ത് നല്കി കാര്യക്ഷമത വര്ദ്ധിപ്പിക്കാന് കെഫോണ് സഹായിക്കും.
- ഉയര്ന്ന നിലവാരമുള്ള നിരീക്ഷണ ക്യാമറകള് സ്ഥാപിക്കാനും. ട്രാഫിക് മാനേജ്മെന്റ് സിസ്റ്റം കാര്യക്ഷമമാക്കാനും കെഫോണ് പദ്ധതി സഹായിക്കും.