തിരുവനന്തപുരം: സംസ്ഥാനത്ത് വടക്കൻ ജില്ലകളിലെ ഒറ്റപ്പെട്ട പ്രദേശങ്ങളിൽ ഇന്ന് ശക്തമായ മഴയ്ക്ക് സാധ്യത. കേരള തീരം മുതൽ മഹാരാഷ്ട്ര തീരം വരെയുള്ള ന്യുനമർദ്ദ പാത്തിയുടെ സ്വാധീനത്തിൽ കേരളത്തിൽ വരും ദിവസങ്ങളിലും മിതമായതോ ഇടത്തരം മഴയോ തുടരും. അതേസമയം തുടർച്ചയായ മഴയ്ക്ക് സാധ്യത കുറവാണ്. കാലവർഷകാറ്റ് കൊങ്കൺ മഹാരാഷ്ട്ര മേഖലയിൽ ശക്തമായി തുടരുന്നതിനാലാണ് വടക്കൻ ജില്ലകളിൽ കൂടുതൽ മഴ സാധ്യത.
ശനിയാഴ്ചവരെ ഒറ്റപ്പെട്ടയിടങ്ങളിൽ ഇടിമിന്നലോടു കൂടിയ മഴയ്ക്ക് സാധ്യതയുണ്ട്. കേന്ദ്ര കാലാവസ്ഥാ വകുപ്പ് വരുംദിവസങ്ങളിൽ വിവിധ ജില്ലകളിൽ യെല്ലോ അലേർട്ട് പ്രഖ്യാപിച്ചിട്ടുണ്ട്. ഇന്ന് മൂന്നിടത്തും നാളെ നാലിടത്തുമാണ് യെല്ലോ അലേർട്ടുള്ളത്.
യെല്ലോ അലേർട്ട്
03 – 07 – 2024: കോഴിക്കോട്, കണ്ണൂർ, കാസർകോട്
04 – 07 – 2024: മലപ്പുറം, കോഴിക്കോട്, കണ്ണൂർ, കാസർകോട്
05- 07 – 2024: മലപ്പുറം, കോഴിക്കോട്, വയനാട്, കണ്ണൂർ, കാസർകോട്
06 – 07 – 2024: കോഴിക്കോട്, കണ്ണൂർ, കാസർകോട്
കാലവർഷം രാജ്യം മുഴുവൻ വ്യാപിച്ചതായി കേന്ദ്ര കാലാവസ്ഥ വകുപ്പ് ഇന്നലെ അറിയിച്ചിരുന്നു. മെയ്‌ 30 നു കേരളത്തിൽ എത്തിയ കാലവർഷം 34 ദിവസമെടുത്തു സാധാരണയിലും ആറുദിവസം നേരത്തെയാണ് ഇത്തവണ രാജ്യം മുഴുവൻ വ്യാപിച്ചത്. കഴിഞ്ഞ വർഷവും ജൂലൈ 2 നാണ് ( 25 ദിവസം ) രാജ്യത്ത് മുഴുവൻ എത്തിച്ചേർന്നത്.
