തിരുവനന്തപുരം : തലസ്ഥാനത്ത് സ്ത്രീസുരക്ഷ വാക്കുകളിൽ മാത്രം ഒതുങ്ങുന്നു. അട്ടക്കുളങ്ങരയിൽ നടുറോഡിൽ യുവതിയെ കടന്നുപിടിച്ച പ്രതിയെ ഫോര്‍ട്ട് പൊലീസ് പിടികൂടി. തമിഴ്നാട് സ്വദേശി 27 വയസുള്ള ഷിഹാബുദ്ദീനാണ് പിടിയിലായത്. അമ്മയ്‍ക്കൊപ്പം വസ്ത്രം വാങ്ങി റോ‍ഡ് മുറിച്ചുകടക്കുന്നതിനിടെ ബൈക്കിലെത്തിയ പ്രതി യുവതിയെ കടന്നുപിടിക്കുകയായിരുന്നു.
സിസിടിവി ദൃശ്യങ്ങളുടെ അടിസ്ഥാനത്തിൽ പൊലീസ് നടത്തിയ അന്വേഷണത്തിനൊടുവിലാണ് പ്രതിയെ പിടികൂടിയത്. സ്വര്‍ണപ്പണിക്കാരനായ ഷിഹാബുദ്ദീൻ താമസിക്കുന്ന ചാലയിൽ നിന്നാണ് ഫോര്‍ട്ട് പൊലീസ് കസ്റ്റഡിയിലെടുത്തത്. തിങ്കളാഴ്ചയാണ് കേസിനാസ്പദമായ സംഭവം നടന്നത്.
അതിക്രമത്തിന് ഇരയായ കൊല്ലം പുനലൂര്‍ സ്വദേശിയായ യുവതി പ്രതിയെ തിരിച്ചറിഞ്ഞു. പ്രതിയെ ഉടൻ പിടികൂടാനായത് പോലീസിനും രക്ഷയായി. പേട്ടയിൽ യുവതിക്ക് നേരെയുണ്ടായ ആക്രമണത്തിൽ പോലീസ് പ്രതിക്കൂട്ടിലായിരുന്നു. പോലീസിന്റെ അന്വേഷണത്തിൽ വീഴച്ച സംഭവിച്ചതായി തെളിഞ്ഞിരുന്നു.
