ന്യൂദൽഹി: മുഖ്യമന്ത്രി അരവിന്ദ് കെജ്രിവാളിനെ അടക്കം കുടുക്കിയ മദ്യ നയ കേസിൽ കെ കവിതയെ സിബിഐ അറസ്റ്റ് ചെയ്തു. മദ്യ നയ കേസിലാണ് അറസ്റ്റ്. ഇഡി അറസ്റ്റ് ചെയ്ത് ജുഡീഷ്യൽ കസ്റ്റഡിയിലുള്ള കവിതയെ ഇന്ന് ചോദ്യം ചെയ്യാൻ സിബിഐ കസ്റ്റഡിയിലെടുത്തിരുന്നു. ചോദ്യം ചെയ്യലിന് പിന്നാലെയാണ് അറസ്റ്റ് രേഖപ്പെടുത്തിയത്. തെലങ്കാനയിലെ ബിആർഎസ് നേതാവാണ് കെ കവിത. ഈ മാസം 23 വരെ കവതിയുടെ ജുഡീഷ്യൽ കസ്റ്റഡി നീട്ടിയിരുന്നെങ്കിലും ഇതിനിടെ സിബിഐ കസ്റ്റഡി ആവശ്യപ്പെടുകയായിരുന്നു.
തെലങ്കാന മുൻ മുഖ്യമന്ത്രി കെ ചന്ദ്രശേഖർ റാവുവിന്റെ മകളെ എൻഫോഴ്സ്മെൻ്റ് ഡയറക്ടറേറ്റ് (ഇഡി) അറസ്റ്റ് ചെയ്തതിന് ശേഷം തിഹാർ ജയിലിൽ പാർപ്പിച്ചിരിക്കുകയാണെന്ന് ഉദ്യോഗസ്ഥർ പറഞ്ഞു. പ്രത്യേക കോടതിയിൽ നിന്ന് അനുമതി വാങ്ങിയ ശേഷം സിബിഐ ഉദ്യോഗസ്ഥർ അടുത്തിടെ കവിതയെ ജയിലിനുള്ളിൽ ചോദ്യം ചെയ്തിരുന്നു.
കൂട്ടുപ്രതിയായ ബുച്ചി ബാബുവിന്റെ ഫോണിൽ നിന്നും ഭൂമി ഇടപാടുമായി ബന്ധപ്പെട്ട രേഖകളിൽ നിന്നും കണ്ടെടുത്ത വാട്ട്‌സ്ആപ്പ് ചാറ്റുകളെ കുറിച്ച് ബിആർഎസ് നേതാവിനെ ചോദ്യം ചെയ്തു. അതിനുശേഷം എക്‌സൈസിനെ സ്വാധീനിക്കാൻ ആം ആദ്മി പാർട്ടിക്ക് 100 കോടി രൂപ നൽകിയെന്നാണ് ആരോപണം. ദൽഹിക്കായുള്ള എക്സൈസ് നയം ഒരു മദ്യലോബിക്ക് അനുകൂലമാക്കുകയായിരുന്നു കവിതയുടെ ലക്ഷ്യം.
കേസിന്റെ ഈ വശങ്ങളിൽ കവിതയെ ചോദ്യം ചെയ്യാൻ സിബിഐ ഉദ്യോഗസ്ഥർ ശനിയാഴ്ച തിഹാർ ജയിലിലേക്ക് പോയിരുന്നു. മാർച്ച് 15 ന് ഹൈദരാബാദിലെ ബഞ്ചാര ഹിൽസിലെ വസതിയിൽ നിന്നാണ് കവിതയെ ഇഡി അറസ്റ്റ് ചെയ്തത്.
