സംസ്ഥാന ചലച്ചിത്ര പുരസ്‌കാരം കഴിഞ്ഞ ദിവസമാണ് പ്രഖ്യാപിച്ചത്. ഹോം ചിത്രത്തിനും ഇതിലെ അഭിനയത്തിന് ഇന്ദ്രന്‍സിനും മഞ്ജു പിള്ളയ്ക്കും യാതൊരു പുരസ്‌കാരവും ലഭിച്ചില്ല. ഇതിന് പിന്നാലെ വലിയ വിമര്‍ശനമാണ് ജൂറിക്ക് എതിരെ ഉണ്ടായത്. ഇപ്പോള്‍ സംഭവത്തില്‍ പ്രതികരിച്ച് രംഗത്ത് എത്തിയിരിക്കുകയാണ് സംവിധായകന്‍ ഒമര്‍ ലുലു.
ഇന്ദ്രന്‍സിന് സംസ്ഥാന ചലച്ചിത്ര അവാര്‍ഡ് നല്‍കാത്ത സംഭവത്തില്‍ ന്യായീകരണ തൊഴിലാളികള്‍ കുറച്ച് നന്നായി വിയര്‍ക്കുമെന്ന് ഒമര്‍ ലുലു പറഞ്ഞു. ന്യായീകരണ തൊഴിലാളികള്‍ കുറച്ച് നന്നായി വിയര്‍ക്കും ഹൃദയത്തില്‍ നിന്നുള്ള ഈ ചിരിയെ തോല്‍പിക്കാന്‍- ഒമര്‍ ലുലു സോഷ്യല്‍ മീഡിയയില്‍കുറിച്ചു. തന്റെ കാഴ്ചപ്പാടില്‍ മികച്ച നടന്‍ ഇന്ദ്രന്‍സ് ആണെന്ന് അദ്ദേഹം നേരത്തെ കുറിച്ചിരുന്നു.
2021ലെ മികച്ച നടനുള്ള പുരസ്‌കാരം ബിജുമേനോനും ജോജു ജോര്‍ജുമാണ് പങ്കിട്ടത്. ആര്‍ക്കറിയാം എന്ന ചിത്രത്തിലെ അഭിനയത്തിനാണ് ബിജു മേനോനു പുരസ്‌കാരം ലഭിച്ചത്. നായാട്ട്, മധുരം, തുറമുഖം, ഫ്രീഡം ഫൈറ്റ് എന്നീ ചിത്രങ്ങളിലെ അഭിനയമാണ് ജോജുവിന് നേട്ടമായത്. ഭൂതകാലത്തിലെ അഭിനയത്തിന് മികച്ച നടിയായി രേവതിയെയാണ് തിരഞ്ഞെടുത്തത്. സിനിമ-സാംസ്‌കാരിക വകുപ്പ് മന്ത്രി സജി ചെറിയാനാണ് പുരസ്‌കാരങ്ങള്‍ പ്രഖ്യാപിച്ചത്.
