മലയാളികളുടെ പ്രിയഗായികയാണ് റിമി ടോമി. റിമിയുടെ പാട്ടും ന്യത്തവും കോമഡികളും പ്രേഷകർക്ക് എന്നും ഇഷ്ടമാണ്. റിമി ടോമി പാടി അഭിനയിച്ച മ്യൂസിക് ആൽബം സുജൂദല്ലേ ഇപ്പോൾ വൈറലാകുകയാണ്. പ്രതീഷ് ജേക്കബ് ആണ് വീഡിയോയിൽ റിമി ടോമിക്കൊപ്പം അഭിനയിക്കുന്നത്. റിമി ടോമിയും പാട്ടും അഭിനയവും ഒരുപോലെ മനോഹരമായിരിക്കുന്നുവെന്നാണ് മ്യൂസിക് വീഡിയോ കണ്ടവർ പറയുന്നത്.
നമസ്‍കാരം, പ്രണാമം എന്ന അർഥത്തിലാണ് ‘സുജൂദല്ലേ’ എന്ന പേര്. മ്യൂസിക് വീഡിയോയുടെ പേര് പോലെ തന്നെ മനോഹരമാണ് പാട്ടും ദൃശ്യങ്ങളും. റിമി ടോമി തന്നെ മ്യൂസിക് വീഡിയോയിൽ നായികയായി എത്തുന്നുവെന്നതു തന്നെയാണ് പ്രത്യേകത.
ഷാരോൺ കെ വിപിന്റേതാണ് കൺസെപ്റ്റും സംവിധാനവും. റോണി റാഫേലാണ് സംഗീത സംവിധാനം നിർവഹിച്ചിരിക്കുന്നത്. സംഗീതത്തിന്റെ പശ്ചാത്തലത്തിലുള്ള ഒരു പ്രണയകഥയാണ് വീഡിയോയിലൂടെ ഇതൾ വിരിയുന്നത്. റിമി ടോമിയുടെ തന്നെ യൂട്യൂബ് ചാനലിലൂടെയാണ് ഗാനം പുറത്തുവിട്ടത്. നവ്യാ നായർ, കുഞ്ചാക്കോ ബോബൻ തുടങ്ങിയ താരങ്ങൾ റിമി ടോമിക്കും സംഘത്തിനും ആശംസകൾ നേർന്ന് ഗാനം റിലീസ് ചെയ്യുകയായിരുന്നു.
മലയാളികളുടെ പ്രിയ ഗാനരചയിതാവ് ബി കെ ഹരിനാരായണനാണ് ‘സുജൂദല്ലേ’യുടെയും വരികൾ രചിച്ചിരിക്കുന്നത്. ആമോഷ് പുതിയാട്ടിൽ ആണ് മ്യൂസിക് വീഡിയോയുടെ ഛായാഗ്രാഹണം നിർവഹിച്ചിരിക്കുന്നത്.
