![saritha-and-rahul](https://thekarmanews.com/wp-content/uploads/2020/11/saritha-and-rahul.jpg)
ദില്ലി: വയനാട് സീറ്റില് നിന്നുള്ള രാഹുല് ഗാന്ധിയുടെ തെരഞ്ഞെടുപ്പ് റദ്ദാക്കണം എന്ന് ആവശ്യപ്പെട്ട് സരിത എസ് നായര് നല്കിയ ഹര്ജി സുപ്രീം കോടതി തള്ളി. വയനാട്ടില് നിന്നുള്ള രാഹുല് ഗാന്ധിയുടെ തെരഞ്ഞെടുപ്പ് ജയം അസാധുവാക്കണമെന്നും വീണ്ടും തെരഞ്ഞെടുപ്പ് നടത്താന് നടപടി സ്വീകരിക്കണം എന്നും ആവശ്യപ്പെട്ടാണ് സരിത സുപ്രീംകോടതിയില് ഹര്ജി നല്കിയിരുന്നത്. എന്നാല് കേസില് പരാതിക്കാരിയും അഭിഭാഷകനും തുടര്ച്ചയായി ഹാജരാവാതിരുന്നതോടെയാണ് സുപ്രീംകോടതി ഹര്ജി തള്ളിയത്. കോടതിയുടെ സമയം നഷ്ടപ്പെടുത്തിയ പരാതിക്കാരിക്ക് ഒരു ലക്ഷം രൂപ പിഴ ചുമത്താനും ചീഫ് ജസ്റ്റിസ് ഉത്തരവിട്ടു.
തുടര്നടപടികള്ക്കായി സുപ്രീംകോടതി പലവട്ടം കേസ് വിളിച്ചെങ്കിലും ഒരിക്കല് പോലും പരാതിക്കാരിയുടെ അഭിഭാഷകന് കോടതിയില് ഹാജരായില്ല. ചീഫ് ജസ്റ്റിസ് അധ്യക്ഷനായ ബെഞ്ച് ഇന്നും ഈ കേസ് പരിഗണിച്ചിരുന്നു. എന്നാല് ആരും ഹാജരായില്ല. ഇതോടെയാണ് ഹര്ജി തള്ളാനും കോടതിയുടെ സമയം നഷ്ടപ്പെടുത്തിയ പരാതിക്കാരിക്ക് ഒരു ലക്ഷം രൂപ പിഴ ചുമത്താനും ചീഫ് ജസ്റ്റിസ് ഉത്തരവിട്ടത്.
ലോക്സഭാ തെരഞ്ഞെടുപ്പില് സരിത എസ് നായര് വയനാട്ടില് നിന്നും എറണാകുളത്ത് നിന്നും മത്സരിക്കാനായി അപേക്ഷ നല്കിയിരുന്നുവെങ്കിലും ക്രിമിനല് കേസില് പ്രതിയാണെന്നതും രണ്ട് കേസിലും ശിക്ഷ വിധി വന്നതാണെന്നും ചൂണ്ടിക്കാട്ടി നാമനിര്ദേശ പത്രികകള് തള്ളപ്പെട്ടിരുന്നു. ഇതിന് പിന്നാലെയാണ് വയനാട്ടില് നിന്നുള്ള രാഹുല് ഗാന്ധിയുടെ തെരഞ്ഞെടുപ്പ് ജയം അസാധുവാക്കണമെന്നും വീണ്ടും തെരഞ്ഞെടുപ്പ് നടത്താന് നടപടി സ്വീകരിക്കണം എന്നും ആവശ്യപ്പെട്ട് സരിത സുപ്രീംകോടതിയില് ഹര്ജി നല്കിയത്.