![PPE](https://thekarmanews.com/wp-content/uploads/2020/08/PPE.jpg)
കരിപ്പൂര് വിമാനാപകടത്തില് പൊലിഞ്ഞ ജീവനുകള് കണ്ണീരോര്മ്മയാണ്. നാളെ മറ്റൊരു വാര്ത്ത വരുമ്പോള് ഏവരും ഈ അപകടം മറക്കുമെങ്കിലും മരണപ്പെട്ടവരുടെ ഉറ്റവര്ക്കും ഉടയവര്ക്കും അത് തീരാ നഷ്ടവുമാണ്. ഉറ്റവരെ കാണാനായി അന്യ നാട്ടില് നിന്നും വര്ഷങ്ങള്ക്ക് ശേഷം എത്തിയവരും മരിച്ചവരിലുണ്ട്. അക്കൂട്ടത്തില് ഒരാള് ആയിരുന്നു വളാഞ്ചേരി സ്വദേശി സുധീര് വാരിയത്ത്. അവസാനമായി പ്രാണന്റെ പാതിയായ സുധീറിനെ ഒന്നു ചേര്ത്ത് പിടിച്ച് പൊട്ടിക്കരയാനോ അന്ത്യ ചുംബനം നല്കുവാനോ ഭാപ്യ സുനിതയ്ക്ക് സാധിച്ചില്ല. മോര്ച്ചറിയുടെ പടികള് ഇറങ്ങിയപ്പോള് ഭര്ത്താവിന്റെ ചേതനയറ്റ ശരീരത്തിലേക്ക് ഒരിക്കല് കൂടി തിരിഞ്ഞുനോക്കിയപ്പോളും സുനിതയുടെ കണ്ണുകള് നിറഞ്ഞൊഴുകുകയായിരുന്നു.
ഒരു വര്ഷത്തെ കാത്തിരിപ്പിന് ഒടുവിലായിരുന്നു സുധീര് നാട്ടിലേക്ക് തിരിച്ചത്. ഉള്ളില് കുന്നോളം സ്വപ്നങ്ങള് നെയ്ത് കൂട്ടിയാണ് അദ്ദേഹം നാട്ടിലേക്ക് തിരിച്ചത്. ഭര്ത്താവിനെ നാളുകള് കൂടി കാണുന്നതിന്റെ സന്തോഷത്തിലായിരുന്നു സുനിത. എന്നാല് എല്ലാം വിമാനാപകടത്തില് പൊലിയുകയായിരുന്നു. അവസാനമായി തന്റെ പ്രിയതമന്റെ മുഖം കാണാന് മോര്ച്ചറി വരാന്തയില് പിപിഇ കിറ്റും ധരിച്ച് സുനിതക്ക് പിന്നെയും മണിക്കൂറുകള് കാത്തിരിക്കേണ്ടി വന്നു. ഒടുവില് സുധീറിന്റെ മൃതദേഹം സംസ്കരിക്കാന് കൊണ്ടുപോകുന്നതിന് മുമ്പ് അന്ത്യയാത്ര ചൊല്ലി സുനിത നിറഞ്ഞ മിഴികളോടെ വീട്ടിലേക്ക് മടങ്ങി.
സുധീറിന്റെ കോവിഡ് പരിശോധനാഫലവുമായി ബന്ധപ്പെട്ട് ആശയക്കുഴപ്പം രാവിലെ തുടങ്ങിയതാണ് അവസാനിച്ചത് വൈകുന്നേരം നാല് മണിക്കും. മരണശേഷം സുധീറിന്റെ കോവിഡ് പരിശോധന പോസിറ്റീവ് ആയിരുന്നു. മൃതദേഹം ബന്ധുക്കള്ക്ക് വിട്ടു നല്കാന് സാധിക്കില്ലെന്നും കോവിഡ് പ്രോട്ടോകോള് അനുസരിച്ച് സംസ്കാരം നടത്തണമെന്നും അധികൃതര് അറിയിച്ചു. തുടര്ന്ന് പിപിഇ കിറ്റ് ധരിച്ച് മൃതദേഹം കാണാനുള്ള അവസരം ബന്ധുക്കള്ക്ക് ഉണ്ടായിരുന്നു.
അവസാനമായി മൃതദേഹം ഒരു നോക്ക് കാണാനായി ഭാര്യ സുനിതയും സഹോദരി സുവര്ണയും പിപിഇ കിറ്റ് ധരിച്ചു. ഇതിനിടെ സുധീറിന് ദുബായില് വെച്ച് കോവിഡ് പോസിറ്റീവ് ആയിരുന്നു എന്നും പിന്നീട് മെയില് നടത്തിയ പരിശോധന നെഗറ്റീവ് ആയിരുന്നുവെന്നും സുഹൃത്തുക്കള് ബന്ധുക്കളെ അറിയിച്ചു. സുധീറിന്റെ മരണം സ്ഥിരീകരിച്ച സ്വകാര്യ ആശുപത്രിയില് ആന്റിബോഡി ടെസ്റ്റ് ആയിരുന്നു നടത്തിയത്. രോഗം ഭേദമായാലും ആന്റിബോഡി മാസങ്ങളോളം ശരീരത്തില് ഉണ്ടാവുന്നതിനാല് പരിശോധനയില് പോസിറ്റീവ് ആകാറുണ്ടെന്ന് ബന്ധുക്കള് പറഞ്ഞു. ദുബായില് പരിശോധന നടത്തിയ രേഖകളും മറ്റും ഇവര് മെഡിക്കല്കോളജ് അധികൃതരെ കാണിച്ചു. ഇതോടെ സുനിതയുടെ ബന്ധുക്കള് വീണ്ടും ആര്ടി-പിസിആര് പരിശോധന വേണമെന്ന് ആവശ്യപ്പെട്ടു. ഇക്കാര്യത്തില് തീരുമാനം വൈകിയതോടെ സുധീറിനെ ഒരു നോക്ക് കാണാനായി സുനിതയുടെ കാത്തിരിക്കല് വീണ്ടും നീണ്ടു.
ഇതിനിടെ മന്ത്രി കെ ടി ജലീല് മോര്ച്ചറിയിലെത്തി ബന്ധുക്കളുമായും ആശുപത്രി അധികൃതരുമായി സംസാരിച്ചു. രണ്ട് പ്രാവശ്യം പരിശോധന നടത്തിയപ്പോഴും രോഗം സ്ഥിരീകരിച്ചതോടെ മൃതദേഹം കോവിഡ് പ്രോട്ടോക്കോള് പ്രകാരം സംസ്കരിക്കുന്നതാണ് ഉചിതമെന്ന് മന്ത്രി ബന്ധുക്കളോട് പറഞ്ഞു. തുടര്ന്ന് മാവൂര് റോഡ് വൈദ്യുത ശ്മശാനത്തില് സംസ്കരിക്കാന് തീരുമാനിച്ചു. നാല് മണിയോടെ പിപിഇ കിറ്റ് ധരിച്ച് സുനിതയെയും സുവര്ണയെയും മോര്ച്ചറിക്കുള്ളിലേക്ക് കൊണ്ടുപോയി. കുറച്ച് അകലെ മാറിനിന്ന് സുനിത അവസാനമായി തന്റെ ജീവന്റെ പാതിയെ കണ്ടു. മോര്ച്ചറിയില് നിന്നും തിരികെ പോകുമ്പോള് സുനിതയുടെ കാഴ്ചകള് കണ്ണുനീര് മറച്ചിരുന്നു.