തിരുവനന്തപുരം: ധനമന്ത്രി തോമസ് ഐസക്കിന് കോവിഡ് സ്ഥിരീകരിച്ചു. മന്ത്രിയുടെ പഴ്സനൽ സ്റ്റാഫ് അടക്കമുള്ളവർ നിരീക്ഷണത്തിൽ പോകാൻ നിർദേശിച്ചു. ആന്റിജൻ പരിശോധനയിലാണ് മന്ത്രിക്ക് കോവിഡ് സ്ഥിരീകരിച്ചത്. ഉടൻ സ്രവ പരിശോധന നടത്തും. ആദ്യമായാണ് കേരളത്തിൽ ഒരു മന്ത്രിക്ക് കോവിഡ് സ്ഥിരീകരിക്കുന്നത്.
അതേസമയം, സംസ്ഥാനത്ത് ആദ്യമായി പ്രതിദിന കോവിഡ് ബാധിതരുടെ എണ്ണം മൂവായിരം കടന്നു. 3082 പേർക്കാണ് ഇന്ന് രോഗം സ്ഥിരീകരിച്ചത്. 2,844 പേർക്കും സമ്പർക്കത്തിലൂടെയാണ് രോഗബാധ. 189 പേരുടെ രോഗ ഉറവിടം വ്യക്തമല്ല. ഇന്ന് 10 മരണം സ്ഥിരീകരിച്ചതോടെ സംസ്ഥാനത്ത് ആകെ കോവിഡ് മരണം 347 ആയി.
ഇന്നും കൂടുതൽ രോഗികൾ തലസ്ഥാനത്താണ്. 582 പേർക്ക് രോഗം സ്ഥിരീകരിച്ചു. കൊല്ലത്ത് 328 പേർക്കും മലപ്പുറത്ത് 324 പേർക്കും രോഗബാധയുണ്ടായി. ആലപ്പുഴ, എറണാകുളം, കോഴിക്കോട്, കണ്ണൂർ, കാസർകോട് ജില്ലകളിൽ ഇരുന്നൂറിലധികമാണ് കേസുകൾ. കോട്ടയം, തൃശൂർ, പാലക്കാട് ജില്ലകളിൽ നൂറിലധികം പേർക്ക് കോവിഡ് സ്ഥിരീകരിച്ചു. 2,196 പേർക്ക് ഇന്ന് കോവിഡ് ഭേദമായി. 22,676 പേരാണ് ഇപ്പോൾ ചികിൽസയിൽ.
