തിരുവനന്തപുരം: മന്ത്രി വി ശവൻകുട്ടിയുടെ ഫോട്ടോ മോർഫ് ചെയ്ത് പ്രചരിപ്പിച്ച സംഭവത്തിൽ ഡിജിപിക്ക് പരാതി നൽകി ശിവൻകുട്ടി.നടൻ ബൈജുവിനൊപ്പം നിൽക്കുന്ന ഫോട്ടോയാണ് മോർഫ് ചെയ്ത് മോൻസൺ മാവുങ്കലിനൊപ്പം നിൽക്കുന്ന തരത്തിലാക്കി പ്രചരിപ്പിച്ചത്. ഇതോടെയാണ് മന്ത്രി നിയമനടപടിക്കൊരുങ്ങിയത്. ചിത്രം വ്യാപകമായി പ്രചരിക്കുന്ന പശ്ചാത്തലത്തിൽ മന്ത്രി ഡിജിപിക്ക് പരാതി നൽകുകയും ചെയ്തു. ഫേസ്ബുക്ക് പോസ്റ്റിലൂടയാണ് മന്ത്രി ഇക്കാര്യം അറിയിച്ചത്. മന്ത്രിയുടെ പോസ്റ്റ് വായിക്കാം.
ക്രൈംബ്രാഞ്ച് അന്വേഷിക്കുന്ന കേസിലെ പ്രതി മോൻസൻ മാവുങ്കലിനൊപ്പം എന്ന രീതിയിൽ എന്നെയും ചേർത്ത് ഒരു ഫോട്ടോ നിക്ഷിപ്ത താൽപര്യക്കാർ പ്രചരിപ്പിക്കുന്നുണ്ട്. തെരഞ്ഞെടുപ്പുകാലത്ത് നടൻ ബൈജു വീട്ടിൽ എത്തിയപ്പോൾ ഞങ്ങൾ രണ്ടുപേരുമുള്ള ഫോട്ടോ എടുത്തിരുന്നു. ഈ ഫോട്ടോ മോർഫ് ചെയ്ത് മോൻസൻ മാവുങ്കലിനൊപ്പം നിൽക്കുന്നു എന്ന തരത്തിലാണ് പ്രചരിപ്പിക്കുന്നത്.
ഷീബ രാമചന്ദ്രൻ എന്ന പേരിലുള്ള അക്കൗണ്ടിൽ നിന്നും കൊണ്ടോട്ടി പച്ചപ്പട എന്ന പേരിലും ചിത്രങ്ങൾ പ്രചരിക്കുന്നുണ്ട്. ഇത് സംബന്ധിച്ച് അന്വേഷണം നടത്താൻ ഞാൻ ഡിജിപിക്ക് പരാതി നൽകിയിട്ടുണ്ട്.
വെറുതെ ഒരു പോസ്റ്റ് ഉണ്ടായതല്ല എന്ന് ഉറപ്പാണ്. പോസ്റ്റിന് പിന്നിൽ ചില രാഷ്ട്രീയ താൽപര്യങ്ങൾ ഉണ്ട് എന്ന് ഞാൻ സംശയിക്കുന്നു.
