കർഷക സമരത്തിന് പിന്തുണ അർപ്പിച്ച് ആക്ടിവിസ്റ്റ് ഗ്രെറ്റ തുൻബർഗ്. തൻ്റെ ട്വിറ്ററിലൂടെയാണ് ഗ്രെറ്റ കർഷക സമരങ്ങളെ പിന്തുണച്ചത്. നമ്മൾ ഇന്ത്യയിലെ കർഷക സമരങ്ങൾക്കൊപ്പമാണ് എന്നാണ് ഗ്രെറ്റ ട്വീറ്റ് ചെയ്തത്. കഴിഞ്ഞ ദിവസം പോപ് ഗായിക റിഹാന്നയും കേന്ദ്ര സർക്കാരിൻ്റെ കാർഷിക നിയമങ്ങൾക്കെതിരെ കർഷകർ നടത്തുന്ന സമരത്തിനു പിന്തുണ അറിയിച്ചു രംഗത്തെത്തിയിരുന്നു.
എന്തുകൊണ്ടാണ് നമ്മൾ ഇതിനെ കുറിച്ച് സംസാരിക്കാത്തത് എന്ന ചോദ്യം തലക്കെട്ടായി നൽകിയാണ് റിഹാന്ന കർഷക സമരത്തിൻ്റെ ചിത്രം പങ്കുവച്ചത്. കർഷക സമരത്തെ തുടർന്ന് ഡൽഹിയിൽ ഇന്റർനെറ്റ് സേവനം നിർത്തലാക്കിയെന്ന വാർത്തയും ഒപ്പമുള്ള ചിത്രവും അടക്കമായിരുന്നു ട്വീറ്റ്. ഇതിനു പിന്നാലെ ബോളിവുഡ് നടി കങ്കണ റണാവത്ത് റിഹാന്നയ്ക്ക് മറുപടിയുമായി രംഗത്തെത്തി. സമരം ചെയ്യുന്നവർ കർഷകരല്ലെന്നും അവർ തീവ്രവാദികളാണെന്നും കങ്കണ കുറിച്ചു. അവർ ഇന്ത്യയെ വിഭജിക്കാനാണ് ശ്രമിക്കുന്നതെന്നും അതുവഴി രാജ്യം പിടിച്ചെടുത്ത് തങ്ങളുടെ കോളനി ആക്കാൻ ചൈന ശ്രമിക്കുകയാണെന്നും കങ്കണ ട്വിറ്ററിൽ കുറിച്ചു.
