![Bollywood actress Rakhi Sawant](https://thekarmanews.com/wp-content/uploads/2023/02/Bollywood-actress-Rakhi-Sawant.jpg)
മുംബൈ. ബോളിവുഡ് നടി രാഖി സാവന്തിന്റെ പരാതിയിൽ ഭർത്താവ് ആദിൽ ഖാൻ ദുറാനിയെ മുംബൈ ഒഷിവാര പൊലീസ് അറസ്റ്റ് ചെയ്തു. റിയാലിറ്റി ഷോയായ ബിഗ് ബോസിന്റെ മറാത്തി പതിപ്പിൽ പങ്കെടുക്കുമ്പോൾ തന്റെ പണം ഭർത്താവ് ദുരുപയോഗം ചെയ്തെന്നും, തന്റെ അമ്മ ജയ സാവന്തിന്റെ മരണത്തിനു കാരണം ദുറാനിയാണെന്നും രാഖി നൽകിയ പരാതിയിൽ പറയുന്നു.
അർബുദ ബാധിതയായിരുന്ന അമ്മയുടെ ശസ്ത്രക്രിയയ്ക്ക്, ദുറാനി കൃത്യസമയത്ത് പണം അടയ്ക്കാതിരുന്നതാണു പെട്ടെന്നുള്ള മരണത്തിനു കാരണമാവുന്നത്. ഭർത്താവ് അറസ്റ്റിലായ വിവരം രാഖി തന്നെയാണു സമൂഹമാധ്യമങ്ങളിലൂടെ പങ്കുവെക്കുകയായിരുന്നു. രാഖിയെ കാണാനായി വീട്ടിലെത്തിയ സമയത്താണ് ദുറാനി അറസ്റ്റിലാവുന്നത്.
‘‘ഇത് നാടകമൊന്നുമല്ല, അയാൾ എന്റെ ജീവിതം നശിപ്പിച്ചു. അയാൾ എന്നെ മർദ്ദിക്കുകയും എന്റെ പണം മോഷ്ടിക്കുകയും ചെയ്തു. എന്നെ പൂർണമായും വഞ്ചിച്ചു’ – രാഖി ഒരു പ്രസ്താവനയിൽ അറിയിച്ചു. ഭർത്താവായ ആദിൽ ഖാൻ ദുറാനിക്കു മറ്റൊരു യുവതിയുമായി ബന്ധമുണ്ടെന്ന് ആരോപിച്ച് രാഖി സാവന്ത് ഒരാഴ്ച മുൻപ് രംഗത്ത് വന്നിരുന്നു. ഈ യുവതിയുടെ പേരുൾപ്പെടെയുള്ള വിശദാംശങ്ങളും രാഖി സാവന്ത് ഇൻസ്റ്റഗ്രാമിലൂടെ പരസ്യമാക്കിയിരുന്നതാണ്.