നടിയും തമിഴ് സൂപ്പർതാരം അജിത്തിന്റെ ഭാര്യയുമായ ശാലിനി ശസ്ത്രക്രിയക്ക് വിധേയയായി. ചെന്നൈയിലെ ആശുപത്രിയിൽ നടന്ന മൈനർ സർജറി വിജയമായിരുന്നു. ഇതിനിടെ അസർബൈജാനിൽ ഷൂട്ടിലായിരുന്ന ഭർത്താവ് അജിത്തും ശാലിനിക്ക് അരികിലെത്തി. വിടാമുയർച്ചിയുടെ ഷൂട്ട് നിർത്തിവച്ചാണ് താരം ചെന്നൈയിലെത്തിയത്.
ആശുപത്രിയിലാണെന്ന വിവരം നടി തന്നെയാണ് സമൂഹമാദ്ധ്യമങ്ങളിലൂടെ അറിയിച്ചത്. ആശുപത്രിയിൽ അജിത്തിനൊപ്പം ഇരിക്കുന്ന ചിത്രമാണ് ശാലിനി പങ്കുവച്ചത്. ‘എന്നും സ്നേഹം മാത്രം’ എന്ന അടിക്കുറിപ്പോടെയാണ് ചിത്രങ്ങൾ പങ്കുവച്ചത്. എന്നാൽ, ശസ്ത്രക്രിയ സമയത്ത് ശാലിനിയോടൊപ്പം അജിത്ത് ഇല്ലായിരുന്നു.
ശസ്ത്രക്രിയക്കുള്ള എല്ലാ സജ്ജീകരണങ്ങളും അജിത് ഒരുക്കിയിരുന്നു. ശസ്ത്രക്രിയ കഴിഞ്ഞ ഭാര്യയെ കാണാൻ ഓടിയെത്തിയ താരത്തിന്റെ ചിത്രങ്ങൾ പെട്ടെന്ന് സോഷ്യൽ മീഡിയയിൽ നിറഞ്ഞു. ചിത്രത്തിന് താഴെ ആരാധകർ ശാലിനിയുടെ രോഗ വിവരത്തെ കുറിച്ചും തിരക്കുന്നുണ്ട്. അടുത്ത ദിവസം അജിത് ചിത്രീകരണത്തിനായി വിദേശത്തേക്ക് മടങ്ങുമെന്നാണ് സൂചന.
