തെറ്റിദ്ധരിപ്പിക്കുന്ന തരത്തിലുള്ള വാർത്തകൾ പ്രചരിപ്പിക്കുന്ന യൂട്യൂബ് ചാനലിനെതിരെ പ്രതികരിച്ച് ഗായികയും നടിയുമായ അഭിരാമി സുരേഷ്. തന്റെ സഹോദരിയും ഗായികയുമായ അമൃത സുരേഷിന്റെയും മകളുടെയും ചിത്രം സഹിതം പ്രചരിച്ച വ്യാജ വാർത്തയ്‌ക്കെതിരെ പ്രതികരിച്ചാണ് അഭിരാമി രംഗത്തെത്തിയത്.
കന്നഡ, തെലുങ്ക് നടി അമൃതയുടെ മകൾ മരിച്ചതിനെ കുറിച്ചാണ് വാർത്ത. എന്നാൽ ഈ വാർത്തയിൽ തമ്പ്‌നെയിൽ ആയി അമൃത സുരേഷിന്റെയും അമൃത എന്ന പേരുള്ള മറ്റു ചില പ്രശസ്തരുടെയും കരയുന്ന ചിത്രം നൽകി പ്രേക്ഷകരെ തെറ്റിദ്ധരിപ്പിച്ചു എന്നാണ് അഭിരാമി പറയുന്നത്.
മരണവാർത്ത പോലും പ്രേക്ഷകരുടെ എണ്ണം കൂട്ടാൻ വേണ്ടി വളച്ചൊടിക്കുകയും തെറ്റിദ്ധരിപ്പിക്കുകയും ചെയ്യുന്നത് അങ്ങേയറ്റം അപലപനീയമാണെന്ന് അഭിരാമി ഫെയ്‌സ്ബുക്കിൽ പങ്കുവച്ച വീഡിയോയിൽ പറഞ്ഞു. വാർത്ത പ്രചരിപ്പിച്ച യൂട്യൂബ് ചാനലിന്റെ പേര് പരാമർശിക്കാതെയാണ് അഭിരാമി പ്രതികരിച്ചത്.
ഇക്കാര്യത്തിൽ നിയമനടപടി ഉദ്ദേശിക്കുന്നില്ലെന്നും എന്നാൽ ഇത്തരം പ്രചാരണങ്ങൾ ഒഴിവാക്കണമെന്നും അഭിരാമി കൂട്ടിച്ചേർത്തു. വിവാദം എവിടെയുണ്ടോ അവിടെ തന്റെ ചേച്ചിയും ഉണ്ടെന്നും ചേച്ചിയുടെ യോഗം അങ്ങനെയായിപ്പോയെന്നും അഭിരാമി പറയുന്നുണ്ട്.
”ഇത്തരം പ്രചാരണങ്ങളോടൊന്നും അമൃത പ്രതികരിക്കാറില്ല. പക്ഷേ ഇത് സഹിക്കാവുന്നതിന്റെ അങ്ങേയറ്റമായി. അനുഭവിക്കുന്നവർക്കേ അതിന്റെ വേദന മനസ്സിലാകൂ. ആ അവസ്ഥ ചിലപ്പോൾ ആത്മഹത്യയിലേക്ക് പോലും നയിച്ചേക്കാം അതുകൊണ്ട് അൽപം ദയ കാണിക്കണം” എന്നും അഭിരാമി വ്യക്തമാക്കി.
