മാവേലിക്കര: ദുര്മന്ത്രവാദം നടത്തുന്നുവെന്ന പരാതി അന്വേഷിക്കാനെത്തിയ വനിതാ ഇന്സ്പെക്ടറെ ക്രൂരമായി ആക്രമിച്ച കേസിൽ പ്രതികൾക്ക് തടവും 50,000 രൂപ വീതം പിഴയും. ആലപ്പുഴ വനിതാസെല്ലില് ഇന്സ്പെക്ടര് ആയിരുന്ന മലപ്പുറം തിരൂരങ്ങാടി ചേലാമ്പ്ര പുല്ലിപ്പറമ്പ് സ്വപ്ന വീട്ടില് മീനാ കുമാരി (59) യെ ആക്രമിച്ച കേസിലാണു പാലമേല് ഉളവുക്കാട് വന്മേലിത്തറയില് ആതിര (ചിന്നു-23), ആതിരയുടെ അമ്മ ശോഭന (50), ഇവരുടെ സഹോദരി രോഹിണി (48) എന്നിവരെ കോടതി ശിക്ഷിച്ചത്. വിവിധവകുപ്പുകളിലായി 13 വര്ഷം ശിക്ഷിച്ചെങ്കിലും ഏഴുവര്ഷം ഒന്നിച്ചനുഭവിച്ചാല് മതി.
ആലപ്പുഴ വനിതാസെല്ലില് ഇന്സ്പെക്ടര് ആയിരുന്ന മലപ്പുറം തിരൂരങ്ങാടി ചേലാമ്പ്ര പുല്ലിപ്പറമ്പ് സ്വപ്ന വീട്ടില് മീനാ കുമാരി (59) യെ ആണ് പ്രതികൾ ആകാരമിച്ചത്. പ്രതികൾ പിഴത്തുകയില് ഒരുലക്ഷം മീനാ കുമാരിക്കു നല്കണമെന്നും ഉത്തരവിലുണ്ട്. 2016 ഏപ്രില് 23-നാണു കേസിനാസ്പദമായ സംഭവം ഉണ്ടായത്.
ആതിര ആള്ദൈവം ചമഞ്ഞ് മന്ത്രവാദവും ആഭിചാരക്രിയകളും നടത്തുന്നുവെന്ന് പാലമേല് പഞ്ചായത്തിലെ ഉളവുക്കാട് വന്മേലില് കോളനി നിവാസികളായ 51 പേര് കളക്ടര്ക്കു പരാതിനല്കിയിരുന്നു.
പരാതി അന്വേഷിക്കാൻ എത്തിയ വനിതാ പോലീസ് ഇന്സ്പെക്ടറെ ആതിരയും ശോഭനയും രോഹിണിയും ചേര്ന്ന് ആക്രമിക്കുകയായിരുന്നു. പെരുവിരലിനു ഗുരുതര പരിക്കേറ്റ മീനാകുമാരിയെ ലേഖയും ഉല്ലാസും ചേര്ന്ന് രക്ഷപ്പെടുത്തുകയായിരുന്നു. വണ്ടാനം മെഡിക്കല്കോളേജിലും തുടര്ന്ന് എറണാകുളത്തെ സ്വകാര്യ ആശുപത്രിയിലും പ്രവേശിപ്പിച്ചു. അടിയന്തര ശസ്ത്രക്രിയയ്ക്കുശേഷം 89 ദിവസം ഇവര് ജോലിക്കു പോകാനാവാത്ത അവസ്ഥയിലായിരുന്നു.