ഖാദര് കമ്മിറ്റി റിപ്പോര്ട്ട് ശുപാര്ശകള് നടപ്പാക്കുന്നത് ഹൈക്കോടതി സ്റ്റേ ചെയ്തു. റിപ്പോര്ട്ടിന്റെ അടിസ്ഥാനത്തിലുള്ള തുടര് നടപടികളാണ് സര്ക്കാര് തടഞ്ഞത്.
ഹൈക്കോടതിയുടെ സിംഗിള് ബഞ്ചാണ് ഉത്തരവ് സ്റ്റേ ചെയ്തിരിക്കുന്നത്. സംസ്ഥാന സര്ക്കാരിന് ഈ വിഷയത്തില് ഹൈക്കോടതി നോട്ടീസ് അയച്ചിട്ടുണ്ട്. പിന്നീട് വിശദമായി വാദം കേട്ട് ഒരു തീരുമാനത്തിലേക്ക് കോടതി എത്തും. രണ്ടുമാസത്തേക്കാണ് കോടതിയുടെ നടപടി.
ലയനം ദേശീയ വിദ്യാഭ്യാസ നയത്തിന് വിരുദ്ധമാണെന്നും ഹയര് സെക്കന്ഡറി സ്കൂളുകളിലെ അധ്യാപകരുടെ അവകാശങ്ങള് ഇല്ലാതാക്കുന്ന നടപടിയാണെന്നും ആരോപിച്ച് നല്കിയ ഹര്ജിയിലാണ് കോടതിയുടെ ഉത്തരവ്.
സര്വ ശിക്ഷാ അഭിയാന്, രാഷ്ട്രീയ മാദ്ധ്യമിക് ശിക്ഷാ അഭിയാന് എന്നിവ ലയിപ്പിച്ച് ഒന്നാക്കാനുള്ള കേന്ദ്ര സര്ക്കാര് നിര്ദേശത്തെ തുടര്ന്ന് അവ നടപ്പാക്കുന്നിന് മാര്ഗനിര്ദേശം നല്കാനായാണ് ഖാദര് കമ്മീഷന് രൂപം നല്കിയത്.
പൊതുവിദ്യാഭ്യാസ ഡയറക്ടറേറ്റ്, ഹയര് സെക്കണ്ടറി ഡയറക്ടറേറ്റ്, വൊക്കേഷണല് ഹയര് സെക്കണ്ടറി ഡയറക്ടറേറ്റ് എന്നിവ സംയോജിപ്പിച്ച് ഒന്നാക്കുക എന്നതായിരുന്നു ഖാദര് കമ്മീഷന്റെ പ്രധാനശുപാര്ശ. സംസ്ഥാനത്തെ ഒന്ന് മുതല് പ്ലസ് ടു വരെയുള്ള എല്ലാ ക്ലാസുകളുടേയും നിയന്ത്രണവും ഏകോപനവും സ്കൂള് വിദ്യാഭ്യാസ ഡയറക്ടറേറ്റില് നിക്ഷിപ്തമാക്കണമെന്ന് കമ്മീഷന് ശുപാര്ശ ചെയ്യുന്നു.