രാജ്യത്തിന് ആശ്വാസമായി കൊവിഡ് രോഗവ്യാപനം കുറയുന്നു. ചികിത്സയിലുള്ളവരുടെ എണ്ണം അഞ്ച് ലക്ഷമായി കുറഞ്ഞു. രോഗമുക്തി നിരക്ക് 91.1 ശതമാനമായി ഉയര്‍ന്നു. കഴിഞ്ഞ 24 മണിക്കൂറിനിടെ അര ലക്ഷത്തിനടുത്ത് മാത്രം പുതിയ രോഗികളെയേ റിപ്പോര്‍ട്ട് ചെയ്തിട്ടുള്ളൂ. കൃത്യമായി 48,648 പേര്‍ക്കാണ് പുതുതായി രോഗം സ്ഥിരീകരിച്ചിരിക്കുന്നത്. 11,64,648 സാമ്പിളുകളാണ് ഇന്നലെ പരിശോധിച്ചതെന്ന് ഐസിഎംആര്‍ അറിയിച്ചു. ഇത് തുടര്‍ച്ചയായ അഞ്ചാം ദിവസമാണ് രാജ്യത്ത് കൊവിഡ് രോഗികള്‍ അര ലക്ഷത്തില്‍ താഴെയാക്കുന്നത്. 563 പേരുടെ മരണവും റിപ്പോര്‍ട്ട് ചെയ്തിട്ടുണ്ട്.
രാജ്യത്ത് കൊവിഡ് രോഗവ്യാപനം കുറയുന്നുവെന്ന വാര്‍ത്ത ആശ്വാസം പകരുന്നതാണെങ്കിലും മരണസംഖ്യ 500 കടന്നത് ആശങ്ക സൃഷ്ടിക്കുന്നുണ്ട്. മരണ നിരക്ക് ഇപ്പോഴും 1.5 ശതമാനമായി തുടരുകയാണ്. ഇക്കാര്യത്തില്‍ ആരോഗ്യ വിഭാഗത്തിന് ആശങ്കയുണ്ട്. കോവിഡിന്റെ തുടക്കം മുതല്‍ ഇന്നുവരെ 1,21,090 പേരാണ് മരണമടഞ്ഞത്.
അതേസമയം ഡല്‍ഹിയിലെ സ്ഥിതി മോശമായിത്തന്നെ തുടരുകയാണ്. കഴിഞ്ഞ ഒരു ദിവസംകൊണ്ട് 5,739 പേര്‍ക്കാണ് ഇവിടെ രോഗം സ്ഥിരീകരിച്ചത്. രാജ്യത്ത് കോവിഡ് സംബന്ധിച്ച ആശങ്ക നിലനില്‍ക്കുന്ന സംസ്ഥാനങ്ങള്‍ കേന്ദ്രീകരിച്ച് രോഗപ്രതിരോധ പ്രവര്‍ത്തനം ഊര്‍ജിതമാക്കാനാണ് കേന്ദ്ര ആരോഗ്യ മന്ത്രാലയം നിര്‍ദേശം നല്‍കിയിരിക്കുന്നത്.
