മിനി സ്ക്രീൻ പ്രേക്ഷകർക്ക് സുപരിചിതയായ അഭിനേത്രിയാണ് മായ കൃഷ്ണ. കോമഡി പ്രോഗ്രാമുകളിലും സ്റ്റേജ് ഷോസിലും സജീവ സാന്നിധ്യമായ മായക്ക് അടുത്തിടെയാണ് സ്വന്തമായി ഒരു വീടു വരെയുണ്ടായത്. ഒരു വീടെന്ന ആഗ്രഹം സഫലീകരിക്കാൻ മായയെ സഹായിച്ചത് നടി സീമ ജി നായരാണ്. ശ്രീവിജയ സീമ എന്നാണ് വീടിന് പേരിട്ടിരിക്കുന്നത്. സീമയോടുള്ള സ്നേഹം തെളിയുന്ന പേര്. ഇപ്പോഴിതാ താനും അമ്മയും അനുഭവിച്ച ജീവിതത്തെക്കുറിച്ചാണ് മായ സംസാരിക്കുന്നത്.
ഇനി വിവാഹം കഴിക്കണം എന്നൊന്നും തോന്നുന്നില്ലെ. ആരെങ്കിലും എന്നോട് ഇഷ്ടം ആണെന്ന് പറഞ്ഞാൽ ചിലപ്പോ നോക്കിയേക്കും പക്ഷെ അമ്മയെ നോക്കുന്ന ആളായിരിക്കണം. അമ്മ അത്രയും കഷ്ടപ്പെട്ടാണ് എന്നെ വളർത്തിയത്. അച്ഛൻ ഞങ്ങളെ ഉപേക്ഷിച്ചുപോയതാണ്. അവർ ലവ് മാര്യേജ് ആയിരുന്നു. ഒന്നരക്കൊല്ലം അവർ ഒരുമിച്ചിയാരുന്നു. എന്നാൽ എന്നെ പ്രസവിക്കാൻ ഒരു ആഴ്ച മാത്രം ബാക്കിയുള്ളപ്പോഴാണ് ഞങ്ങളെ ഉപേക്ഷിച്ച് അച്ഛൻ പോകുന്നത്.
അച്ഛൻ പോയതോടെ അമ്മയെ നോക്കാൻ ആരും ഇല്ലാതെ ആയി. പ്രണയിച്ചു വിവാഹിതർ ആയതുകൊണ്ട്കൂടി വീട്ടിൽ നിന്നും ആരും സപ്പോർട്ടിന് ഉണ്ടായില്ല. അച്ഛൻ പോയപ്പോൾ പോലും അമ്മയ്ക്ക് അറിയില്ലായിരുന്നു. ജോലി കിട്ടി പോയതാണ് ഇപ്പോൾ വരും എന്ന പ്രതീക്ഷയിൽ ആണ് അമ്മ ജീവിച്ചത്. പ്രസവസമയത്ത് പോലും ആരും ഉണ്ടായിരുന്നില്ല, അതിന് ശേഷം അച്ഛൻ വന്നിട്ടില്ല. അച്ഛനെ കണ്ടിട്ടില്ല. നാലാം ക്‌ളാസിൽ പഠിക്കുമ്പോൾ ആണ് അയാൾ വേറെ വിവാഹം കഴിച്ചെന്ന് അറിയുന്നത്.
അച്ഛന് നമ്മളെ വേണ്ടാത്തതുകൊണ്ടാണ് പോയത് പിന്നെ എന്തിനാണ് അയാളുടെ പണം. അതുകൊണ്ടുതന്നെ കേസ് പറയാനോ, പൈസ വാങ്ങി എടുക്കാനോ നമ്മൾ നിന്നില്ല. അമ്മയുടെ ജീവിതം കണ്ടിട്ടാണ് ഞാൻ വളർന്നത്. അതുകൊണ്ടുതന്നെ പ്രേമിക്കാൻ ഒക്കെ പേടി ആയിരുന്നു. അച്ഛനില്ലാതെ വളരുമ്പോൾ സമൂഹത്തിൽ നിന്നും പലതും കേട്ടിട്ടുണ്ട്. അമ്മ ഒറ്റയ്ക്ക് ജീവിക്കുന്നതിന്റെ വിഷയങ്ങൾ കുറെ നേരിടേണ്ടി വന്നിട്ടുണ്ട്.
ഇനി അയാളെ വേണ്ട എന്ന് അമ്മ രണ്ടാം ഭാര്യയുടെ വീട്ടുകാരോട് പറഞ്ഞിരുന്നു. പിന്നെ കേസ് ഒക്കെ പറഞ്ഞുപോയാൽ പൈസ വേണമല്ലോ. അതും ഉണ്ടായില്ല. അമ്മ ഗർഭിണി ആയിരുന്നപ്പോൾ എന്തിനാണ് പോയത് എന്ന് ഇനി ഒരിക്കൽ അയാളെ കണ്ടാൽ ചോദിക്കണം. വിവാഹം കഴിക്കാത്തത് പ്രണയം കൊണ്ടായിരുന്നു എന്നൊക്കെ ആളുകൾ ചോദിക്കുന്നുണ്ട്. എന്നാൽ അമ്മയുടെ ജീവിതം കണ്ടുവന്നതുകൊണ്ട് ഒരു പേടിയുണ്ട്- നടി സരിതയുടെ ചാനലിൽ മായ പറയുന്നു.
