പട്ടാമ്പി റോഡിൽ മഞ്ചക്കല്ലിൽ പ്രവർത്തിക്കുന്ന ഭാരത് പെട്രോളിയം പമ്പ് ജീവനക്കാരനെ സംഘം ചേർന്ന് മർദിച്ച കേസിൽ മൂന്നുപേരെ കൂടി പോലീസ് പിടികൂടി. കച്ചേരിക്കുന്ന് സ്വദേശികളായ കുലുക്കാംപാറ അൻവർ ഹുസൈൻ (31), പുത്തൻ പീടിയക്കൽ മുജീബ് റഹ്മാൻ (26), കുലുക്കാംപാറ ആഷിഖ് (25) എന്നിവരെയാണ് ചെർപ്പുളശേരി പൊലീസ് അറസ്റ്റ് ചെയ്തത്.
ഇതോടെ അഞ്ച് പേർ പിടിയിലായി. ഇവർ യഥാക്രമം ഒന്നും രണ്ടും മൂന്നും പ്രതികളാണ്. നേരത്തേ ചെർപ്പുളശ്ശേരി സലഫി നഗർ വലിയ പറമ്പിൽ വീട്ടിൽ വിഷ്ണു (22) സലഫി നഗർ വലിയ പറമ്പിൽ വീട്ടിൽ ജീഷ്ണു (22) എന്നിവരെ അറസ്റ്റ് ചെയ്തിരുന്നു.
കഴിഞ്ഞ മാസമായിരുന്നു സംഭവം. പട്ടാമ്പി റോഡിൽ മഞ്ചക്കല്ലിൽ പ്രവർത്തിക്കുന്ന ഭാരത് പെട്രോളിയം പമ്പ് ജീവനക്കാരനെ ഇരുപതോളം പേർ ചേർന്നു ക്രൂരമായി മർദിച്ച സംഭവത്തിൽ 8 പേർക്കെതിരെ ജാമ്യമില്ലാ വകുപ്പു പ്രകാരം ചെർപ്പുളശ്ശേരി പൊലീസ് കേസെടുത്തിരുന്നു. ഞായറാഴ്ച വൈകിട്ട് ബൈക്കിൽ പെട്രോൾ നിറയ്ക്കാനെത്തിയ യുവാക്കൾ ഓൺലൈൻ വഴി പണം നൽകിയ ശേഷം അതിന്റെ സമയം ചോദിച്ചതിനെ ചൊല്ലിയുണ്ടായ തർക്കത്തെ തുടർന്നായിരുന്നു ആക്രമണം.
