ദത്ത് വിവാദത്തില്‍ അനുപമയുടെ ഭര്‍ത്താവ് അജിത്തിനെതിരെ പരിഹാസവും അധിക്ഷേപവുമായി പിഎസ് പ്രശാന്ത്. ഒരു ഭാര്യ നിലവിലിരിക്കെ മറ്റൊരു പെണ്‍കുട്ടിയെ വഞ്ചിച്ച് അമ്മയാക്കിയ മഹാനാണ് അജിത്ത് എന്ന് പ്രശാന്ത് പറഞ്ഞു. മാധ്യമങ്ങള്‍ കൊട്ടിഘോഷിക്കുന്ന പിതൃത്വത്തിന് വിപ്ലവം നടത്തിയ ഉത്തമനായ അച്ഛനാണ് അജിത്തെന്നും പ്രശാന്ത് പരിഹസിച്ചു.
പിഎസ് പ്രശാന്ത് പറഞ്ഞത് ഇങ്ങനെ: ഇദ്ധേഹത്തെ അറിയില്ലെ..? മാധ്യമങ്ങള്‍ കൊട്ടിഘോഷിക്കുന്ന പിതൃത്വത്തിനായി വിപ്ലവം നടത്തിയ ഉത്തമനായ അച്ഛന്‍. ഒരു ഭാര്യ നിലവിലിരിക്കെ മറ്റൊരു പെണ്‍കുട്ടിയെ വഞ്ചിച്ച് അമ്മയാക്കിയ മഹാന്‍. ഇദ്ധേഹത്തിന്. ‘മര്യാദ രാമന്‍’ പുരസ്‌കാരം കൊടുക്കാനും കൂടി മാധ്യമങ്ങള്‍ ശുപാര്‍ശ ചെയ്യണം.
അതേസമയം, ദത്ത് വിവാദത്തില്‍ ശിശുക്ഷേമ സമിതി ജനറല്‍ സെക്രട്ടറി ഷിജൂ ഖാന് പിന്തുണയുമായി സിപിഐഎം തിരുവനന്തപുരം ജില്ലാ സെക്രട്ടറി ആനാവൂര്‍ നാഗപ്പന്‍ രംഗത്തെത്തി. ഇപ്പോള്‍ ഒരു നടപടിയും ഷിജൂഖാന്റെ പേരില്‍ എടുക്കില്ല. ദത്ത് വിവാദത്തില്‍ ഷിജൂഖാന്റെ പേരില്‍ പിഴവുണ്ടെന്ന് ഇത് വരെ തെളിഞ്ഞിട്ടില്ല. വകുപ്പ് തല അന്വേഷണ റിപ്പോര്‍ട്ട് രഹസ്യരേഖയല്ല. അത് പുറത്ത് വരട്ടെയെന്നും എല്ലാ കാര്യവും പറയാന്‍ ഷിജൂഖാനും പരിമിതിയുണ്ടെന്നും ആനാവൂര്‍ നാഗപ്പന്‍ പറഞ്ഞു.
ആരോപണത്തിന്റെ പിന്നാലെ പോകുന്നത് സിപിഐഎമ്മിന്റെ ജോലിയല്ല. എന്നാല്‍ വീഴ്ച്ച സംഭവിച്ചെന്ന് കണ്ടാല്‍ പാര്‍ട്ടി പരിശോധിക്കും. ശിശുക്ഷേമ സമിതിക്ക് ലൈസന്‍സില്ല എന്നത് തെറ്റായ വാര്‍ത്തയാണ്. ആരെങ്കിലും സമരം ചെയ്തെന്ന് വിചാരിച്ച് ഒരാള്‍ക്കെതിരെ നടപടി എടുക്കാന്‍ സാധിക്കില്ല. പ്രതിഷേധം നടത്താനും അഭിപ്രായം പറയാനും അനുപമയ്ക്ക് അവകാശമുണ്ടെന്നും ആനാവൂര്‍ നാഗപ്പന്‍ പറഞ്ഞു.
