നടൻ ദിലീപിനൊപ്പമുള്ള ചിത്രം സോഷ്യൽ മീഡിയയിലൂടെ പങ്കിട്ട് രാഹുൽ ഈശ്വർ. ചിത്രത്തിന് രസകരമായ ക്യാപ്ഷനാണ് രാഹുൽ ഈശ്വർ നൽകിയിരിക്കുന്നത്.റഷ്യ ഉക്രെയ്ൻ യുദ്ധത്തിന് ഉത്തരവാദിയായ മനുഷ്യനെ കണ്ടുമുട്ടിയെന്നും സുഡാനിലെ ആഭ്യന്തരയുദ്ധത്തിന് പിന്നിലും ആഗോളതാപനത്തിന് ഉത്തരവാദിയുമാണെന്നും ഇത് മലയാളികളല്ലാത്തവർക്ക് മനസിലാകില്ലഎന്നും കുറിച്ച് സ്മൈലി സ്റ്റക്കറുകളോടെയാണ് രാഹുൽ ഈശ്വർ ചിത്രം പങ്കുവെച്ചിരിക്കുന്നത്.
നിരവധി പേർ പോസ്റ്റ് മനസിലാക്കി ചിരിക്കുന്ന സ്മൈലികളും കമൻ്റ് ചെയ്തിട്ടുണ്ട്. ദിലീപുമായി ബന്ധപ്പെട്ട വിഷയത്തിൽ ചാനൽ ചർച്ചകളിലെ പതിവ് മുഖമാണ് രാഹുൽ ഈശ്വർ. നടിയെ ആക്രമിച്ച കേസിൽ നടനും പ്രതിയുമായ ദിലീപാണ് ശരിക്കും ഇരയായത് എന്ന് നേരത്തെ രാഹുൽ ഈശ്വർ പറഞ്ഞിരുന്നു.
സമകാലിക വിഷയങ്ങളിൽ തൻ്റെതായ നിലപാടുകൾ തുറന്നു പറയുകയും അത് സമർത്ഥിക്കുകയും ചെയ്തു വാർത്തകളിലും വിവാദങ്ങളിലും നിറഞ്ഞു നിൽക്കുന്നയാളാണ് രാഹുൽ ഈശ്വർ. നടൻ ദിലീപുമായി ബന്ധപ്പെട്ട വിഷയങ്ങളിൽ ചാനൽ ചർച്ചകളിലെ സജീവ മുഖമായിരുന്നു രാഹുൽ ഈശ്വർ. ദിലീപ് വിഷയത്തിൽ ദിലീപിനെ അനുകൂലിച്ച് രംഗത്ത് വന്നവരിൽ എന്നും രാഹുൽ ഈശ്വർ മുന്നിലുണ്ടായിരുന്നു. നമ്പി നാരായണന് ശേഷം കേരള ചരിത്രത്തിൽ ഏറ്റവും വേട്ടയാടപ്പെട്ട വ്യക്തി ദിലീപാണെന്നും രാഹുൽ ഈശ്വർ പറഞ്ഞിട്ടുണ്ട്
