ന്യൂഡല്‍ഹി: ബി.ജെ.പിയുമായി കൈകോര്‍ക്കുമെന്ന് അഭ്യൂഹങ്ങള്‍ തള്ളി മഹാരാഷ്ട്ര മുഖ്യമന്ത്രി ഉദ്ധവ് താക്കറെ. താന്‍ എവിടേയും പോകില്ലെന്നും സഖ്യത്തില്‍ തുടരുമെന്ന് ഉദ്ധവ് താക്കറെ വ്യക്തമാക്കി .
“ഞാന്‍ അജിത് പവാറിനും ബാലസാഹേബ് തൊറാട്ടിനും ഒപ്പമാണുള്ളത് .താന്‍ എവിടെയും പോകാന്‍ ഉദ്ദേശിക്കുന്നില്ല. വാര്‍ത്ത സമ്മേളനത്തിന് ശേഷം താന്‍ ബി.ജെ.പിയുമായാണ് ചര്‍ച്ചക്ക് പോകുന്നതെന്നും തമാശയായി ഉദ്ധവ് താക്കറെ കൂട്ടിച്ചേര്‍ത്തു .
അതെ സമയം നേരത്തെ ശിവസേന-ബി.ജെ.പി ബന്ധത്തെ കുറിച്ച്‌ സഞ്ജയ് റാവത്ത് പ്രസ്താവന നടത്തിയിരുന്നു. ശിവസേന- ബി.ജെ.പി ബന്ധം ആമിര്‍ ഖാന്‍-കിരണ്‍ റാവു ബന്ധം പോലെയാണെന്നായിരുന്നു റാവത്തിന്‍റെ പരാമര്‍ശം.
തങ്ങള്‍ ഇന്ത്യയേയും പാകിസ്താനേയും പോലെയല്ല. ബന്ധം വേര്‍പ്പെടുത്തിയെങ്കിലും ഇരു പാര്‍ട്ടികളും തമ്മിലുള്ള സൗഹാര്‍ദം തുടരുമെന്നായിരുന്നു റാവത്ത് പ്രഖ്യാപിച്ചത് . കൂടാതെ ശിവസേന തങ്ങളുടെ ശത്രുവല്ലെന്ന് ബി.ജെ.പി നേതാവ് ദേവേന്ദ്ര ഫഡ്നാവിസും പ്രസ്താവിച്ചിരുന്നു . ഇതിന് പിന്നാലെയാണ് ഇക്കാര്യത്തില്‍ ഉദ്ധവ് താക്കറെ വിശദീകരണവുമായി രംഗത്തെത്തിയത് .
