കേരളത്തിന്റെ ഭാവിയെ കുറിച്ച് 10 പുതിയ പ്രവചനങ്ങളുമായി ദുരന്തനിവാരണ വിദഗ്ധനും യുഎൻ ഉദ്യോഗസ്ഥനുമായ മുരളി തുമ്മാരുകുടി. നേരത്തെ കേരളത്തിലെ ബോട്ട് ദുരന്തവും ഡോക്ടറുടെ കൊലപാതകവും പ്രവചിച്ചിരുന്ന മുരളി തുമ്മാരുകുടിയുടെ പോസ്റ്റുകൾ സാമൂഹ്യ മാധ്യങ്ങളിൽ വൈറലായിരുന്നു. ഇതിന് പിറകെയാണ് ഇപ്പോൾ കൂടുതൽ പ്രവചനങ്ങളുമായി മുരളി തുമ്മാരുകുടി ഫേസ്ബുക്കിൽ കുറിപ്പിട്ടിരിക്കുന്നത്.
2030 ആകുമ്പോഴേക്കും ഉള്ള കേരളാത്തിന്റെ അവസ്ഥയാണ് കുറിപ്പിൽ മുരളി തുമ്മാരുകുടി പറയുന്നത്. സ്‌കൂളുകളും കോളേജുകളും 30 ശതമാനം പൂട്ടിത്തുടങ്ങുമെന്നും, ഡിവോഴ്സ് കേരളത്തിൽ വർദ്ധിക്കുമെന്നും, അറേഞ്ച്ഡ് മാരേജ് അപൂർവ്വമായി സംഭവിക്കുന്ന ഒന്നാകുമെന്നും അദ്ദേഹം പറയുന്നു. പെരുമ്പാവൂർ ഉൾപ്പെടെയുള്ള നഗരങ്ങളിൽ വന്യമൃഗങ്ങളെത്തും, ഭൂമിയുടെ വില കുറയും അന്യസംസ്ഥാന തൊഴിലാളികളുടെ എണ്ണം കുറയും, എന്നിങ്ങനെയാണ് മറ്റു പ്രവചനങ്ങൾ.
മുരളി തുമ്മാരുകുടിയുടെ ഫേസ്ബുക്ക് പോസ്റ്റിന്റെ പൂർണ്ണരൂപം ഇങ്ങനെ:
പത്തു പ്രവചനങ്ങൾ : എന്റെ വല്യച്ഛൻ, കിഴുപ്പള്ളി അച്യുതൻ നായർ, പേര് കേട്ട ഒരു ജ്യോൽസ്യൻ ആയിരുന്നു. ചെറുപ്പത്തിൽ അച്ഛന്റെ വീട്ടിൽ പോകുന്പോൾ രാവിലെ ഏഴു മണിമുതൽ വൈകീട്ട് എട്ടു മണിക്കും വല്യച്ഛനെ കാണാൻ വീട്ടിൽ ആളുണ്ടാകും. ഗുരുത്വവും ദൈവാധീനവും ആണ് താൻ ചെയ്യുന്ന തൊഴിലിൽ മറ്റുള്ളവർ വിശ്വാസമർപ്പിക്കാൻ കാരണം എന്ന് വല്യച്ഛൻ വിശ്വസിച്ചിരുന്നു.
ഞാൻ പക്ഷെ ജ്യോതിഷത്തിൽ ഒന്നും വിശ്വസിക്കുന്ന ആളല്ല. എന്നാൽ ഭൂതവും വർത്തമാനവും ശരിക്കും ശ്രദ്ധിക്കുകയും പഠിക്കുകയും ചെയ്താൽ ഭാവി പ്രവചിക്കാൻ സാധിക്കും എന്ന് വിശ്വസിക്കുന്ന ഒരാളാണ്. അതുകൊണ്ടാണ് ഇടക്കിടക്ക് കുറച്ചു പ്രവചനങ്ങളുമായി വരുന്നത്. തൽക്കാലം ഫ്ളാറ്റിലെ അഗ്നിബാധയും രൂപയുടെ താഴോട്ടുള്ള പോക്കും ആണ് ഞാൻ പ്രവചിച്ചു വെച്ചതിൽ ഇനി ബാക്കിയുള്ളത്. അതിനധികം സമയമില്ല.
അതുകൊണ്ട് കുറച്ചു പ്രവചനങ്ങൾ പുതിയത് എടുക്കാം: 2030 ആകുന്നതോടെ, 1. കേരളത്തിലെ ജനസംഖ്യ കുറഞ്ഞു തുടങ്ങും. 2. കേരളത്തിലെ ഡിവോഴ്സ് റേറ്റ് ഇന്നത്തേതിന്റെ പത്തിരട്ടിയാകും, ഇന്ത്യയിൽ # 1 ആകും. 3. അറേഞ്ച്ഡ് മാരേജ് എന്നുള്ളത് അപൂർവമായി സംഭവിക്കുന്ന ഒന്നാകും. 4. പെൻഷൻ പ്രായം അറുപതിന് മുകളിൽ പോകും. 5. ഓരോ പഞ്ചായത്തിലും ഓരോ റിട്ടയർമെന്റ് ഹോം ഉണ്ടാകും. 6. പെരുമ്പാവൂർ ഉൾപ്പടെയുള്ള നഗരങ്ങളിൽ വന്യമൃഗങ്ങൾ എത്തും. 7. കേരളത്തിൽ സ്‌കൂളുകളും കോളേജുകളും മുപ്പത് ശതമാനം എങ്കിലും പൂട്ടിത്തുടങ്ങും. 8. ഒരേക്കറിന് മുകളിലുള്ള ഭൂമിയുടെ വില കുറഞ്ഞു വരും. 9. വിദേശത്തുനിന്നും വരുന്ന പണത്തിന്റെ അളവ് കുറഞ്ഞു വരും. 10. കേരളത്തിൽ പണിയെടുക്കുന്ന അന്യസംസ്ഥാന തൊഴിലാളികളുടെ എണ്ണം താഴേക്ക് വരും. നിങ്ങളുടെ അഭിപ്രായം കേൾക്കട്ടെ. ഇതൊക്കെ നടക്കുമോ?
– മുരളി തുമ്മാരുകുടി
