കോഴിക്കോട്: കെഎസ്ആർടിസി ബസും ബൈക്കും കൂട്ടിയിടിച്ച് രണ്ട് യുവാക്കൾക്ക് ദാരുണാന്ത്യം. അപകടത്തിൽ ബൈക്ക് യാത്രികരായ പാലക്കാട് സ്വദേശികളാണ് മരിച്ചത്. കണ്ണൂർ റോഡിൽ ക്രിസ്ത്യൻ കോളേജ് ജംഗ്ഷന് സമീപമായിരുന്നു അപകടം. ഇന്ന് പുലർച്ചെ 4.50-ഓടെയായിരുന്നു സംഭവം. മണ്ണാർക്കാട് സ്വദേശികളായ ഫായിസ് അലി, ഫർസാൻ സലാം എന്നിവരാണ് മരിച്ചത്.
അതേസമയം, വീട്ടുമുറ്റത്ത് കളിക്കുന്നതിനിടെ രണ്ട് വയസുകാരൻ പാമ്പ് കടിയേറ്റ് മരിച്ചു. മലപ്പുറം കൊണ്ടോട്ടി പുളിക്കലിൽ ഇന്നലെ രാവിലെയാണ് ദാരുണ സംഭവം. പെരിന്തൽ മണ്ണ തൂത സുഹൈൽ – ജംഷിയ ദമ്പതികളുടെ മകൻ മുഹമ്മദ് ഉമർ ആണ് മരിച്ചത്. രാവിലെ വീട്ടുമുറ്റത്ത് കളിക്കുന്നതിനിടെയാണ് കുട്ടിയുടെ കാലിൽ കടിയേറ്റത്.
കരച്ചിൽ കേട്ട് രക്ഷിതാക്കൾ വീടിന് പുറത്തെത്തി കുട്ടിയെ എടുത്ത് പരിശോധിച്ചപ്പോഴാണ് കാലിൽ കടിയേറ്റ പാടുകൾ കണ്ടെത്തിയത്. ഉടനെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും രാത്രിയോടെ മരണം സ്ഥിരീകരിക്കുകയായിരുന്നു.
