തിരുവനന്തപുരം: അഴിമതിയില് മുങ്ങിയ ഭരണമാണ് കേരളത്തിലെന്ന് മെട്രോമാന് ഇ ശ്രീധരന്. മുഖ്യമന്ത്രി പിണറായി വിജയന് ജനങ്ങളുമായി സമ്പര്ക്കം കുറവാണെന്നും, സിപിഎമ്മിന് ജനങ്ങളുടെ ഇടയില് മോശം ഇമേജാണെന്നും കുറ്റപ്പെടുത്തി മെട്രോമാന് ഇ ശ്രീധരന്. അഴിമതിയില് മുങ്ങിയ ഭരണമാണ് കേരളത്തിലെന്ന് അദ്ദേഹം പറഞ്ഞു. മുഖ്യമന്ത്രിക്ക് പത്തില് മൂന്ന് മാര്ക്ക് പോലും നല്കാനാകില്ലെന്നും ഇ ശ്രീധരന് പറഞ്ഞു.
തിരഞ്ഞെടുപ്പില് പാലക്കാട്, മലപ്പുറം ജില്ലകളിലെ മണ്ഡലത്തില് സ്ഥാനാര്ത്ഥിയാകാന് താല്പര്യമുണ്ടെന്നും, സര്ക്കാരിന്റെ ഭാഗമാവണമെന്നാണ് ആഗ്രഹമെന്നും ഇ ശ്രീധരന് വ്യക്തമാക്കി.താന് ചേര്ന്നാല് ബിജെപിയുടെ മുഖച്ഛായ മാറും. കേരളത്തെ രക്ഷിക്കാന് ഇതേ ഒരു വഴിയുള്ളൂ. സംസ്ഥാന നേതാക്കളാണ് തന്നെ കണ്ട് മത്സരിക്കാന് ആവശ്യപ്പെട്ടത്. ബിജെപിയിലെ പലരും പ്രോത്സാഹിപ്പിച്ചുവെന്നും ഇ ശ്രീധരന് പറഞ്ഞു.
പിണറായി വിജയന്റെ ഭരണത്തില് ഏകാധിപത്യമാണ് നടക്കുന്നത്. അധികാരം മുഖ്യമന്ത്രി ആര്ക്കും വിട്ടുകൊടുക്കുന്നില്ലെന്നും ശ്രീധരന് വിമര്ശിച്ചു. പിണറായി മന്ത്രിസഭയില് ഒരു മന്ത്രിക്കും ഒന്നും ചെയ്യാന് സ്വാതന്ത്ര്യമില്ല. ഉദ്യോഗസ്ഥ സംവിധാനത്തിന്റെ തെറ്റായ ഉപദേശങ്ങളാണ് പിണാറായി സ്വീകരിക്കാറുളളത്. എല്ഡിഎഫ് സര്ക്കാര് വീണ്ടും കേരളത്തില് വന്നാല് ദുരന്തമാകുമെന്നും ശ്രീധരന് പരിഹസിച്ചു.
തന്റെ ഔദ്യോഗിക ജീവിതം കഴിഞ്ഞുവെന്നും ഇനി രാഷ്ട്രീയത്തില് ഇറങ്ങി സംസ്ഥാനത്തിന് വേണ്ടി നല്ലത് ചെയ്യണമെന്നും ശ്രീധരന് പറഞ്ഞു. യുഡിഎഫ്- എല്ഡിഎഫ് പക്ഷത്ത് ചേരില്ല. സിപിഐഎമ്മും കോണ്ഗ്രസും സംസ്ഥാനത്ത് പരാജയം ഏറ്റുവാങ്ങിയ പാര്ട്ടികളാണ്. ബിജെപിയോട് പണ്ടേ സഹാനുഭൂതിയുണ്ട്. 20 വര്ഷത്തിന് ഇടയില് നല്ല വ്യവസായം കേരളത്തില് വന്നിട്ടില്ല. യുവാക്കള്ക്ക് അവസരമില്ലെന്നും അടിസ്ഥാന സൗകര്യങ്ങള് വികസിപ്പിക്കണമെന്നും ഇ ശ്രീധരന് പറഞ്ഞു.