മലയാളികളുടെ പ്രിയ നടൻ ജഗതി ശ്രീകുമാറിന്റെ മകളാണ് ശ്രീലക്ഷ്മി ശ്രീകുമാർ. ചില സിനിമകളിലൂടെയും ബിഗ്‌ബോസിലൂടെയും ശ്രീലക്ഷ്മി പ്രേക്ഷകർക്ക് സുപരിചിതയാണ്. അഞ്ചുവർഷത്തെ നീണ്ട പ്രണയത്തിനൊടുവിലാണ് ശ്രീലക്ഷ്മിയുടെ വിവാഹം നടന്നത്. ദുബായിൽ സ്ഥിരതാമസമാക്കിയ കോമേഴ്‌സ്യൽ പൈലറ്റായ ജിജിൻ ജഹാംഗീറിനെയാണ് വിവാഹം കഴിച്ചത്.
കൊല്ലം സ്വദേശിയായ ജിജിനും കുടുംബവും ദുബായിൽ സ്ഥിരതാമസമാക്കിയവരാണ്. 2019 നവംബർ 17 ന് കൊച്ചിയിലെ ഗ്രാൻഡ് ഹയാത്തിലായിരുന്നു വിവാഹം.
ഇപ്പോളിതാ ഭർത്താവ് ജിജിന് ജന്മദിനാശംസ നേർന്ന് ശ്രീലക്ഷ്മി ശ്രീകുമാർ. സമൂഹമാധ്യമത്തിലാണ് ശ്രീലക്ഷ്മി ഹൃദ്യമായ ആശംസ കുറിച്ചത്. ജിജിനൊപ്പമുള്ള ഒരു ചിത്രവും പങ്കുവച്ചിട്ടുണ്ട്. ‘‘എന്നെ അദ്ഭുതപ്പെടുത്താൻ ഒരിക്കലും മടികാണിക്കാത്ത എന്റെ അമേസിങ് ഹസ്ബന്റിന് ജന്മദിനാശംസകൾ. നിങ്ങൾ നിങ്ങളായിരിക്കുന്നതിനും എന്നെ സന്തോഷവതിയാക്കാൻ ചെയ്യുന്ന കാര്യങ്ങൾക്കും നന്ദി. ഒരോ നിമിഷത്തിലും ഓരോ ശ്വാസത്തിലും ഞാൻ നിങ്ങളെ സ്നേഹിക്കുന്നു. നമ്മൾ മികച്ച ജോഡികൾ തന്നെയാണ്.’’- ശ്രീലക്ഷ്മി കുറിച്ചു.
ജഗതി ശ്രികുമാറിന്റെ രണ്ടാം ഭാര്യയായ കലയിലെ മകളാണ് ശ്രീലക്ഷ്മി. ശ്രീലക്ഷ്മി സ്വന്തം മകളാണെന്ന് നടൻ പൊതുസമൂഹത്തെ അറിയിച്ചിട്ടുണ്ടെങ്കിലും ശ്രീലക്ഷ്മിയെ ഇപ്പോഴും ജഗതിയുടെ കുടുംബം അംഗീകരിച്ചിട്ടില്ല. 
ജഗതി അപകടത്തെതുടർന്ന് കിടപ്പിലായ ശേഷം ഈ മകളെ അച്ഛനെ കാണിക്കാൻ പോലും പലപ്പോഴും ആ കുടുംബം തയ്യാറായിട്ടില്ല. എന്നാലും മലയാളികൾക്ക് ജഗതിയുടെ ഈ മകൾ മറ്റ് മക്കളെക്കാൾ പ്രിയപ്പെട്ടവളാണ്.
