തിരുവനന്തപുരം: സംസ്ഥാന പോലീസ് തലപ്പത്ത് വന്‍ അഴിച്ച് പണിക്കൊരുങ്ങി സര്‍ക്കാര്‍. ഡിജിപി സ്ഥാനം മുതല്‍ താഴേക്ക് ഉന്നത പോലീസ് ഉദ്യോഗസ്ഥരില്‍ മാറ്റങ്ങളുണ്ടാകും. ലോക്നാഥ് ബെഹ്റ സ്ഥാനമൊഴിയുന്ന പശ്ചാത്തലത്തില്‍ ടോമിന്‍ ജെ. തച്ചങ്കരി സംസ്ഥാന പൊലീസ് മേധാവിയായേക്കുമെന്ന് സൂചന. ഡി.ജി.പി സ്ഥാനത്തേക്ക് ടോമിന്‍ ജെ. തച്ചങ്കരിയെ സര്‍ക്കാര്‍ സജീവമായി പരിഗണിക്കുന്നുവെന്ന റിപ്പോര്‍ട്ടുകളാണ് പുറത്ത് വരുന്നത്.
അനധികൃത സ്വത്ത് സമ്ബാദകേസില്‍ തച്ചങ്കരിക്കെതിരായ അന്വേഷണം പൂര്‍ത്തിയായെന്ന റിപ്പോര്‍ട്ടുകളുണ്ട്. അന്വേഷണം വേഗത്തില്‍ പൂര്‍ത്തിയാക്കണമെന്ന് ആവശ്യപ്പെട്ട് തച്ചങ്കരി സര്‍ക്കാറിന് കത്ത് നല്‍കിയതായാണ് വിവരം.
ഡി.ജി.പി സ്ഥാനത്തേക്ക് സര്‍ക്കാര്‍ തീരുമാനിച്ച ഉദ്യോഗസ്ഥരുടെ പട്ടിക കേന്ദ്രത്തിന് മുന്നിലാണ്. ഇക്കാര്യത്തില്‍ കേന്ദ്ര ആഭ്യന്തരമന്ത്രാലയം വൈകാതെ ചുരുക്കപ്പട്ടിക കൈമാറുമെന്നാണ് സൂചന. അതേസമയം, ഡി.ജി.പി ലോക്നാഥ് ബെഹ്റക്ക് സിയാല്‍ എം.ഡി സ്ഥാനവും നല്‍കിയേക്കും. ബെഹ്റയെ സംസ്ഥാന പൊലീസ് ഉപദേശകനാക്കുമെന്ന വാര്‍ത്തകളും പുറത്ത് വരുന്നുണ്ട്.
