രാജ്യത്തെ ഏറ്റവും പ്രധാനപ്പെട്ട തിരിച്ചറിയല്‍ രേഖകളില്‍ ഒന്നായ ആധാര്‍ കാര്‍ഡില്‍ ഉപഭോക്താക്കള്‍ക്ക് ഇനി ഫോട്ടോയും എളുപ്പത്തില്‍ മാറ്റാം.
പേര് ജനന തീയ്യതി ഉള്‍പ്പടെയുള്ള വിശദാംശങ്ങള്‍ മാറ്റുന്നതു പോലെ തന്നെ വളരെ എളുപ്പത്തില്‍ തന്നെ ആധാര്‍ കാര്‍ഡിലെ ഫോട്ടോ മാറ്റാം. ഇതിനായി അടുത്തുള്ള ആധാര്‍ എന്റോള്‍മെന്റ് സെന്ററില്‍ പോകുക. ശേഷം അവിടെ നിന്ന് ആധാര്‍ എക്‌സിക്യൂട്ടീവിന്റെ സഹായത്തോടെ ആളുകള്‍ക്ക് ആധാര്‍ കാര്‍ഡിലെ ഫോട്ടോ മാറ്റാനാകും.
25 രൂപയും ജിഎസ്ടിയുമാണ് ഫോട്ടോ മാറ്റുന്നതിന് ചാര്‍ജായി ഈടാക്കുക. യുഐഡിഎഐ വെബ്സൈറ്റ് വഴി ഫോട്ടോ മാറ്റുന്നതിനുള്ള അഭ്യര്‍ത്ഥന സമര്‍പ്പിച്ച് കഴിഞ്ഞാല്‍ കാര്‍ഡ് ഉടമയ്ക്ക് ഒരു യുആര്‍എന്‍ നമ്പറും അക്ക്നോളഡ്ജ്മെന്റ് സ്ലിപ്പും ലഭിക്കും. അതിനായി ആദ്യം ആധാര്‍ എന്റോള്‍മെന്റ് ഫോം ഡൗണ്‍ലോഡ് ചെയ്ത് പൂരിപ്പിക്കുക. പിന്നീട് പൂരിപ്പിച്ച ഫോമുമായി അടുത്തുള്ള ആധാര്‍ എന്റോള്‍മെന്റ് സെന്ററില്‍ പോകുക. അവിടെ നിന്ന് ഫോമിലെ വിവരങ്ങള്‍ വെച്ച് ആധാര്‍ എക്സിക്യൂട്ടീവ് ബയോ മെട്രിക് വിശദാംശങ്ങള്‍ ശേഖരിക്കും.
തുടര്‍ന്ന് ഫോട്ടോ എടുക്കും. തുടര്‍ന്ന് ചാര്‍ജ് ഈടാക്കിയതിന് ശേഷം സ്ലിപ്പും യുആര്‍എന്‍ നമ്പറും നല്‍കും. ഈ യുആര്‍എന്‍ ഉപയോഗിച്ച് ആധാര്‍ കാര്‍ഡിലെ ഫോട്ടോ മാറിയിട്ടുണ്ടോ എന്ന് പരിശോധിക്കാം. ഫോട്ടോ അപ്‌ഡേറ്റ് ചെയ്തതിന് ശേഷം പുതിയ ഫോട്ടോയോടു കൂടിയ ആധാര്‍ കാര്‍ഡ് യുഐഡിഎഐ വെബ്‌സൈറ്റില്‍ നിന്ന് ഡൗണ്‍ലോഡ് ചെയ്യാം.
