ലോക്ക് ഡൗൺ കാലഘട്ടത്തിൽ സോഷ്യൽ മീഡിയയിൽ ഏറ്റവുമധികം വൈറലായ വീഡിയോ ആണ് നടി ആനി അവതരിപ്പിക്കുന്ന പരിപാടിയുടേത്. ആദ്യം സരയു മോഹൻ ആനീസ് കിച്ചനിൽ അതിഥിയായി എത്തിയതായിരുന്നു വൈറലായത്. ഒപ്പം രണ്ട് നടിമാർക്കും വിമർശനങ്ങളും ലഭിച്ചു. പിന്നാലെ നവ്യ നായരും നിമിഷ സജയനയുമെത്തിയ എപ്പിസോഡിലെ ചില വീഡിയോസും പുറത്ത് വന്നു.
ആനി അവതാരകയായെത്തുന്ന ആനീസ് കിച്ചണെക്കുറിച്ചും സമൂഹമാധ്യമങ്ങളിലെ ട്രോളുകളെക്കുറിച്ചും താരം മനസ്സ് തുറക്കുന്നു. സരയു അതിഥിയായി എത്തിയ പരിപാടിയിൽ സ്ത്രീ പുരുഷന് ഒരുപടി താഴെ നിൽക്കുന്നതാണ് നല്ലതെന്നും, നവ്യയോട് ഒരുപാട് ഭക്ഷണ വിഭവങ്ങൾ തയ്യാറാക്കുന്ന ഒരു നല്ല വീട്ടമ്മയെ കുറിച്ച് പറഞ്ഞതും നിമിഷ സജയനോട് മേക്കപ്പ് ഇല്ലാതെ എങ്ങനെ അഭിനയിക്കും എന്ന് ചോദിച്ചതുമെല്ലാം ആനിയെ ട്രോളുകൾക്ക് ഇരയാക്കി. 
സത്യത്തിൽ താൻ നിമിഷയെ അഭിനന്ദിക്കുകയാണ് ചെയ്തതെന്ന് ആനി പറയുന്നു. “ഈ തലമുറയിലെ കുട്ടികൾ പരീക്ഷണത്തിന് തയ്യാറാണ്. നമ്മുടെ കാലഘട്ടത്തിൽ, അതിന് വളരെയധികം ധൈര്യം ആവശ്യമായിരുന്നു. മേക്കപ്പ് ഇല്ലാതെ അഭിനയിക്കാൻ കഴിയുന്ന ഒരു റോളിനായി ഞാൻ ആഗ്രഹിച്ചിരുന്നു. ആഗ്രഹം ഇപ്പോഴും നിറവേറ്റപ്പെടുന്നില്ല. വളരെയധികം ആത്മവിശ്വാസത്തോടെ മേക്കപ്പ് ഇല്ലാതെ നന്നായി അഭിനയിക്കാൻ സാധിക്കുമെന്ന് നിമിഷ പറഞ്ഞപ്പോൾ, കൂടുതൽ അറിയാൻ എനിക്ക് ജിജ്ഞാസയുണ്ടായിരുന്നു.”
ഞാൻ ജനിച്ചതും വളർന്നതും വളരെ യാഥാസ്ഥിതിക കുടുംബത്തിലാണ്. അതിനാൽ ഇന്നത്തെ തലമുറ ആസ്വദിക്കുന്ന സ്വാതന്ത്ര്യം ഒരിക്കലും തനിക്ക് ആസ്വദിക്കാൻ സാധിച്ചിട്ടില്ല. എന്റെ ലോകം വളരെ പരിമിതമായിരുന്നു. 
വിവാഹശേഷം മാത്രമാണ് ഞാൻ പല പുതിയ കാര്യങ്ങളും പഠിച്ചത്. ഞങ്ങൾ വളരെ ചെറുതായിരുന്നപ്പോഴെ അമ്മ മരിച്ചു. പിന്നീട് ഞങ്ങളെ വളർത്തിയത് മുത്തശ്ശിയാണ്. മുത്തശ്ശിയും അമ്മായിമാരും ഞങ്ങളെ സ്വയം പര്യാപ്തമാക്കാനും ഒരു കുടുംബത്തെ പരിപാലിക്കാൻ പഠിക്കാനും നിരന്തരം ഉപദേശിക്കാറുണ്ടായിരുന്നു.
അമ്മയാണെ സത്യം എന്ന ബാലചന്ദ്രമേനോൻ സിനിമയിലൂടെയാണ് മലയാളി പ്രേക്ഷകരുടെ മുന്നിലേക്ക് ആനി എത്തുന്നത്. അഭിനയരംഗത്ത് സജീവമായിരുന്നത് വെറും മൂന്നു വർഷങ്ങൾ മാത്രമാണെങ്കിലും ഇന്നും പ്രേക്ഷകർക്ക് ഇഷ്ടത്തോടെ ഓർക്കാൻ ഒരു പിടി നല്ല കഥാപാത്രങ്ങൾ സമ്മാനിച്ചാണ് താരം അഭിനയത്തോടു വിട പറഞ്ഞത്.
