കൊച്ചി: കുറുപ്പ് സിനിമയുടെ പ്രെമോഷന് വേണ്ടി കാര് സ്റ്റിക്കര് ഒട്ടിച്ച് റോഡില് ഇറക്കിയ സംഭവുമായി ബന്ധപ്പെട്ട് ഫേസ്ബുക്ക് പോസ്റ്റുമായി യൂട്യൂബര്മാരായ ഇ ബുള്ജെറ്റ് സഹോദരന്മാര് രംഗത്ത്. വാഹനം അനുവാദമില്ലാതെ രൂപമാറ്റം ചെയ്തതിന്റെ പേരില് മോട്ടോര് വാഹന വകുപ്പിന്റെ നടപടി നേരിട്ട ഇ ബുള്ജെറ്റ് സഹോദരന്മാരുടെ വാര്ത്ത കേരളത്തില് അടുത്തിടെ വലിയ ചര്ച്ചയായിരുന്നു. മോട്ടോര് വാഹന വകുപ്പിന്റെ ഇരട്ടത്താപ്പ് നയം അവസാനിപ്പിക്കണമെന്നും ഇതിനെതിരെ ഇന്ന് ഒന്പത് മണിക്ക് ശക്തമായി പ്രതികരിക്കുമെന്നും ഇവര് ഫേസ്ബുക്ക് കുറിപ്പില് വ്യക്തമാക്കി.
അതേസമയം ദുല്ഖറിന്റെ ‘കുറുപ്പ്’ എന്ന സിനിമയുടെ പ്രമോഷന്റെ ഭാഗമായി സ്റ്റിക്കര് ഒട്ടിച്ച കാറിനെതീരെ ഉയര്ന്ന വിവാദത്തില് അണിയറപ്രവര്ത്തകര് വിശദീകരണവുമായി രംഗത്തെത്തി. നിയമപ്രകാരം പണം നല്കിയാണ് വാഹനത്തില് സ്റ്റിക്കര് ഒട്ടിച്ച് പ്രചാരണം നടത്തിയതെന്ന് ബന്ധപ്പെട്ടവര് വ്യക്തമാക്കി. ഇതുമായി ബന്ധപ്പെട്ട നിയമപ്രകാരമുള്ള എല്ലാ കാര്യങ്ങളും പാലക്കാട് ആര്ടിഒ ഓഫിസില് ചെയ്തിട്ടുണ്ടെന്നും അതിന് ശേഷമാണ് വാഹനം റോഡില് ഇറക്കിയതെന്നും അണിയറ പ്രവര്ത്തകര് അറിയിച്ചു.
ഇബുള്ജെറ്റിന്റെ ഫേസ്ബുക്ക് പോസ്റ്റിന്റെ പൂര്ണ്ണരൂപം;
MVD ഈ ഇരട്ടത്താപ്പ് നയമാണ് ആദ്യം അവസാനിപ്പിക്കേണ്ടത് രണ്ടു വണ്ടിയും വൈറ്റ് ബോര്ഡ് പക്ഷേ ഞങ്ങള് ചെയ്ത തെറ്റ്. കുറുപ്പിന്റെ പ്രമോഷന് ചെയ്ത ഈ വണ്ടി ശരി. കേരളത്തിന്റെ അങ്ങേയറ്റം മുതല് ഇങ്ങേയറ്റം വരെ ഓടിയ വണ്ടി ഇതുവരെ ഒരു ഉദ്യോഗസ്ഥര് പോലും പരിശോധിച്ചിട്ട് പോലുമില്ല. സിനിമാതാരങ്ങള്ക്ക് എന്തും ആകാം. പക്ഷേ ഞങ്ങളെപ്പോലുള്ള പാവം ബ്ലോഗര്മാര് എന്തുചെയ്താലും അത് നിയമവിരുദ്ധമാക്കി കാണിക്കാന് ഇവിടെ പലരും ഉണ്ട്. ഒരു മീഡിയക്കാര് പോലും ഈ ഒരു കാര്യം പുറത്തു പോലും കൊണ്ടുവന്നിട്ടില്ല ഞങ്ങള് അതിശക്തമായി ഇന്ന് രാത്രി 9 മണിക്ക് ഇതിനെതിരെ ഞങ്ങള് പ്രതികരിക്കുന്നു.
എന്നാല് ഈ വാഹനം കൊണ്ട് ദുല്ഖര് സല്മാന് ഡ്രാഫ്റ്റ് ചെയ്യുകയും പല അഭ്യാസങ്ങള് കാണിക്കുകയും ചെയ്തപ്പോള് അത് സമൂഹത്തിന് നല്ലതും, ഞങ്ങള് തെറ്റ് ആയി മാറുന്നത് എങ്ങനെ എന്ന് എനിക്ക് മനസ്സിലാവുന്നില്ല. പാവപ്പെട്ട വണ്ടിയില് നിന്നും ഉപജീവനം നേടുന്നവരെ ദ്രോഹിക്കുകയും ഇവരെ പോലുള്ള നടന്മാരെ പൂജിക്കുകയും ചെയ്യുന്നത് എവിടെ നിന്നാണ് എന്ന് എനിക്ക് മനസ്സിലാകുന്നില്ല.